Magway Division, Gangaw District leilu lam a om khua pawl khatah January 25 ni zan (9:30Pm) hun pawlin gal kidona bang mah omlo pi-in SAC galkapte in vanleng tawh bomb khiat uh a, khua sung mi 4 liam hi, ci-in khua mite tung pan kiza hi. January 25 ni, zan nai 9:30 pawlin gal vanleng (Jet fighter 2 tawh Kan village, Mauk Lin village leh Kyauk-gu phungyi sang nung lamte ah bomb tang 3 khiat uh ci hi.
Vanleng tawh a kapna hangin khuasung mi 4 liam uh a, mi khat a phei kitan in nasia liam mahmah ci hi. “Zan kim laitak a ong khiat uh ahih manin, mi khat apheipi kitan tanin a liam vekpi bel 4 pha uh hi. Lang nih kidona bangmah om lopi in SAC galkapten Vanleng tawh bomb hong khiat uh hi ” ci-in khuamite’n Social media tungtawn in a genna kizasawn hi.
Gal vai thukante genna-ah, Gangaw gam pen Chin State lutna lampi khat hi a, Thau tawi khangno (Revolutionary) pawlte hatna mun zong ahi hi. SAC galkap pawlin leilam pan zo nawnlo uh ahih manin vanlam pan khuasung mipite ngim in, bomb khiat ngekngek uh ci hi. A beisa January 23 ni-in zong Pauk leh Htee lin gamgi teng vanleng tawh kap uh a, ni 3 sung in Yaw gam huam ah 2 vei bang vanleng tawh kikapna omin, phungyi sang kim nangawn khen loin phial kap gawp uh ci hi.
Hits: 1