Gaza Strip kidona akipat pan November 29, 2025 ni ciangciang Palestine mipi a si vekpi 70000 val ta ci-in Hamar ngongtat pawl thuneihna ahi Gaza Cidamna lam zumpi (health ministry) in pulakkhia uh hi. Gaza Health Ministry Department in a pulakkhiat Palestine a si amang tawh kisai pen man taktak lo ding hi ci-in, Israel in nial uh himah leh UN in bel man leh dik mah dingin um uh hi.
Hih Gaza gal akipatcil abeisa 2023 October 7, ni-in gamgi kantan / phukhia in Israelte’ gam sung khuapite ah Harmas leh akipawlpih ngongtat Thau tawi pawlin a busimna hangin, Israel 1200 val si-in, 251 te Gaza lamah galmat in paipih mang uh hi.
Tua khit ciangin Israel in dokik / phulak kipan pah uh a, Gaza strip sungah kum 2 val Hamar ngongtatte nasiatak do/ kap kipan uh hi. Israel te khengval lua liang uh a, Hamas ngongtat te bek hi loin, Palestine mipite alom atangin lei lam leh vanlam tawh thalum ziahziah uh hi.
Hih Israel leh Hamars buaina pen America in kilemna / galvenna ding deihna tawh tukum October 10, 2025 ni akipan kikapna khawlna (Cease fire) a bawlpih khit akipan nangawn ah Gaza khuapi ah atawm atam kidona om lai veve hi.
Gaza Health Ministry in abeisa November 29 ni a pulakna ah Gaza kidona ah Palestine mipi a si vekpi 70500 bang pha ta ci hi. Hih misi sazian pen Health Department mipilte’ kaihkhop hi a, a huampi in bel man leh dik dingin International Community leh UN in kipsak uh hi.
Israel leh Hamar kikal kidona khawl ding thukimna akingah zawh nangawn in Palestine mipi 352 bang om leuleu hi ci-in Gaza Health Ministry in genkhia hi. Ahi zongin misi sazian ah Hamar galkapte leh mipite kikhen tuam loin akigawm mang ci hi.
Israel te’n a genna belah Hamas leh Palestine ngongtat pawlte in kikapna tawlnga / khawlsan ding cih thukimna pen a phelkik / a utloh manin, kidona pan kikkik uh hi ci-in mawhsak uh hi. Hamas te leuleu in tua mawhsakna pen nial uh a, kikapna khawl ding tawh kisai zahtak in, akizuih laitak hi ci-in tangko uh hi. Tua banah amau nih kikal ah a lemtuah / Palai sem tuamtuam pan Kumpi ten bel kilemna ding thukimna a susia Israelte’ tungah hilhna / vauna nasiatak piak ciat dingin November 29, 2025 ni-in Hamas pawlin ngetna / tangkona nei uh hi.
Hits: 4