Chin State, Hakha khuapi kiang a om Ukna buluh (SAC)te’ Camp khat pen Chinland Council pawlin tuni November 30, 2024 ni zingsang (09:30am) hunin buluh in lakhiazo uh a, SAC lamte Battalion Commander tawh nautang 11 si-in, 19 hingmat uh cih thu Chin State sung a Thuthak kante’ tungtawn in Tongsan Media in thu kingah sawn hi.
” Hakha khuapi tawh kigamla lo mun ah om Ruazavung Camp hiveh aw. Tuni zingsang tungin kibuluh zo suak ve maw.! Thuman leh kiciantak thusuahna a om nailoh hangin, akician in bel Battalion Commander si cih kician hiphot! SAC nautang 19 bel a mau Thau leh galvante ciat tawh kipummat hi. Hih Ruazavung Camp kim teng bel SAC te’n galvanleng tawh kap ziahziah uh himai ” ci-in Hakha khuapi pan galvai tawh kisai Thuthak kan khatin genkhia hi. Tua banah adang galvai tawh kisai Thuthak kankhia khatin a genna ah, ” SAC Camp battalion Commander kihel nautang 11 te’ luang hawm kiciantak kimukhia hiphot ” ci-in genbeh hi.
Kidona laitak mahin SAC lamte’n galvanleng tawh gal huhin naistak kap ngekngek uh ci hi. Camp kim tengah kidona bel nasia mahmah lai ci hi. Kido kikapna tawh kisai CNA leh a kipawlpih pawlte lam pan kiciantak thusuahna nei nailo uh ci hi. CNA leh a kipawlpihte’n bel Hakha leh Thantlang khuapi kikal a om ukna buluh (SAC)te’ galphual Point-3 kici Mualbawk zong November nipi kaal nihna sungin buluh kipan uh a, November 26, ni-in lakhiazo uh hi. Tua banah CDF- Hakha in zong Rung Operation min pua in, Hakha khuapi ah SAC te tawh nasiatak kidona nei uh ci hi.
Abeisa October 28, 2024 ni-in zong Hakha khuapi kiang a om SAC Kimtlang Camp lakkhiatna sungah SAC lamte Major khat leh adang 4 hingmat uh cih thu CDF- Hakha in genkhia uh hi. Tua mah bangin Chin Brothethood Alliance pawlte in zong tulaitak Mindat leh Falam khuapite lakhiat dingin nasiatak galdona nei uh hi. Chin State sunga om Ukna buluh (SAC)te’ galphual khempeuh a sawt loin kilakhia siang ta ding cih thuging kiza hi.
Hits: 3