Chin State, Hakha leh Thantlang khuapi kikal a SACte’ galphual Auto Hill camp pen tuni December 8, 2024 nitak lam (3:30Pm) hunin Chinland Council leh a bel pawlte in busim in lakhiazo taktak ta cih thu CNF /CNA thugenpi Salai Hteet Ni in genkhiatna nei hi.
“Tuni nitak lam (3:30pm) hun pawlin Auto Hill buppi kiumcip in kilakhiazo ngaw ngaw ta! Lei lam pan galphual lakna tawh kisai thuzakna om nailo ahih manin, a thu leh la kiciantak pulaktheihna om thei nailo hi. Galvan bel honkhat kingah hiphot. SAC te ahih leh Thantlang lam pan nungkik uh hi. Tu ciangciang bel SAC pawlin vanlam pan Bomb khiat ziahziah phot uh ” ci-in CNF /CNA thugenpi Salai Htet Ni in Chinland Channel in genkhia hi.
Hakha khuapi leh Thantlang khuapi kikal a om SACte’ galphualte pen abeisa November 22, 2024 ni akipan Chinland Council leh a pawlten Jericho Operation min pua in, nasiatak kisim in kilakhiazo a, nipi kaal nih sungin SACte’ Camp om khempeuh busim in lakhiamang zo suak uh hi. Chin State sungah SACte’ Camp phualpi om laite ahih leh Mindat., Falam leh Tedim khuapite bek om lai cih kiza hi.
Hits: 3