Hamas ngongtat pawlte in kum 2 sung a matcip / kepcip uh Israel mi 20 te tuni October 13, 2025 ni-in, khahkhia ta ahihna thu Hamas makaite’n leitung Social Media khempeuh ah pulakkhia zihziah hi. Hih teng cihloh galmat dang om nawn loin, a vekpi kikhahkhia ta ahihna zong gencianna nei uh hi. Tua banah akep sungin a si, misi luang hawmte zong piakkhiat lai dingin genbeh uh hi.
Hamaste in a galmat Israelte a khahkhiat khit ciangin Israel lam pan zong Palestine thongkia tampi a khahkhiat kul ding ci hi. A kikhah masa dingte pen Palestine thongkia vekpi 1,700 te khahkhiat dingin lametna kinei ci hi.
A galmat mi 20 te pen Gaza pan a suahtak khit ciangin Israel gam huam sungah a ciahkik uh hita hi. Amaute pen abeisa 2023 October 7, 2025 ni a Hamas pawlte’n gamgi kikhakna phuzan in, Israel mipite a kaih mang (galmat) 250 valte’ sung pan a suakta nunung pen ahi hi. Hamaste’ khut sungah Israel 28 omlai ci hi.
Israeli galkapte’ genkhiatna ah galmat 20 teng kikhahkhia taktak ahihna kipsakna nei uh a, tuate sungah mihing 3 te ahih leh Zato lamah amau cidamna ki-en cian sak dingin, helicopter tawh kipuaksak suak pahpah cih kigen hi. US President Donald Trump makaihna tawh kilemna bawl ding a tangkona tungtawn in, Gaza gal kidona abei siangna ding pen thukikupna neih dingin Israel gam a hawh US President Trump in bel Middle East ading tangthu thak kipatna taktak hita ci-in genkhia hi.
Trump in Israel Paliament ah thugenna a neih khit ciangin Egypt gamah kinei ding Gaza Peace Forum ah khualzin maban zomsuak hi. Tua Forum ah Israel PM Benjamin Nethanjahu leh Palestine President Mahmoud Abbas te zong kihel ding cih thu Media ten genkhia uh hi.
Hits: 4