Abeisa October 1, 2024 ni a Iran te’n Israel gam khuapi pawl khat akap/ a dona uh tawh kisai-in, Israel te’n phulak kik pelmawh dingin a pulakkhiatna tawh kizui-in, tuni October 26, 2024 ni zingsang tungin Iran khuapi Tehran leh Karaj khuapite vanlam tawh kap ziahziah ta uh a, khuapi sungah a puakkham thei tuamtuam puakkham ziahziah kiza cih thu Iran News and Media lamten genkhia uh hi.
Israel Defense Ministry in bel Iran gam a target na munte uh kap thei uh hi, ci-in, X Media tungah a suahkhiat uh hangin, a thu kicingin suahkhia lo uh hi. Iran in bel abeisa October 7, 2024 ni akipan Iran gam pan a kap uh pen tatsat loin tuni ciang dong mun 7 panin a do ngekngek uh ahi hi. Tua bang a Iran in Israelte ado masakna pen pello in phulakkik ding cih thu leitung gam tuamtuamte leh UN tungah thuhkik theihna om ahihna tawh kizui-in, a thukkik / phula kik uh ahihna thu Israel in tangko uh hi.
US gamdang vai saipipa Antony Blinken pen nisuahna laizang (Middle East) lam a khualzinna pan a tunkik khit phetin, Israel in Iran tungah phulakna / thuhkikna anei uh ahi hi. Hih kidona pen abeisa October 1, 2024 ni a, Iran in ballistic drone thautang 300 val tawh Israel a dona uh pen thuhkikna hi, ci-in US White House, National Security pan Mr. Sean Savett in genkhia hi.
Hits: 1