Sagaing Division, Kalay Township ah a (1) veina Mipi Galdo Kipawlnate Kimuhkhopna (Kalaytownship People’s Strike Steering Committee) pen abeisa October kha sungin nei uh a, tua lai ah pai khawm tengin Ukna buluh (SAM) in thumanlo/ zuaupi tawh a bawl sawm uh kiteelna pen nasiatak langpan/ nial dingin thukimna a bawlna uh November 11, 2025 ni-in Thusuah khiatna nei cih thu Committee makai khatin genkhia hi.
Hih SAM makaih thumanlo kiteelna langpanna / nialna-ah akihel Kalaymyo pansan Revolution kipawlnate leh mipite khempeuh khut khat tawi khekhat khai bangin pilvang leh kidawm siam takin mapang khawm dingin khensatna nei uh ci hi. Tua bana-ah Kalaymyo pua lam muan huainaa omte leh Kalaymyo kim leh paam a om khuaneu tuamtuam pan khua makai tangmi vekpi 120 val paikhawm uh hi.
Ukna buluh (SAM) in a neih sawm uh ahi thumanlo kiteelna tawh kisai-in, SAM in mipite tungah a khangkhang in zawh thawh a gamtatnate sel cip uh a, leitung gambup in a thukimpihna ding a deihna tawh zuaupi kiteelna a bawl sawmna pen Politics thang siahna ahihna thu Kalaymyo Mipi Galdo Kipawlna (Kalaytownship People’s Strike Steering Committee) pan makai khatin genkhia hi.
Hih Kalaytownship People’s Strike Steering Committee (KPSSC) makaite in a genna ah Mualmi kipawlna (ethnic organizations)te, gamsung gampua Revolutionary kipawlnate (domestic and foreign revolutionary forces), leitung gamte kipawlnate (international organizations), mihing huh kipawlnate (humanitarian organizations), Kipumpiak nasemte (volunteers), na hoih sem kipawlnate (charitable groups) cihte tawh kizoptuahna nei-in, mapankhop ding cih thute limgen uh cih kiza hi.
Hits: 7