Sagaing Division, Kalewa khuapi sungah Tuk guah tam luatna hangin July 8, 2024 ni-in, Chindwin gunpi nasiatak let ahih manin, khuapi sung khempeuh tui-in tumcip ci hi. Hih Kalewa khuapi tui khanna pen abeisa kum 30 sungah a nasia pen leh a lauhuai pen dinmun in kiciamteh cih thu Kalewa khua miten gen uh hi .
Khua hun lam sai mipilte’n July 8, ni sun laitak a tehna ah Kalewa khuapi pen Chindwin gun tui khanna tawh kisai Lauhuai ciamtehna khengin Pi 3′ (Centimeters 106) val khangto khin bek tham loin, ni 1, 2 sungin (pi 2′) kiim bang khang thei lai ding ahih manin, Khuapi sung Lauhuai dinmun ciamtehna kheng val suak kha thei lai ding hi ci-in genkholhna nei uh hi.
“Kum 30 sungah a lauhuai pen hi dinmun hita in, Ko inn khum dawnah letto ta ahih manin tua munah ka om cip uh hi. Huhna leh panpihna cihte bang mah kingah nai loin, hih zah val tui hong khantoh ding lungkham huai leh dahhuai mahmah dinmun kitung ding hita ” ci-in, khuami khatin genkhia hi.
Khua hun lam tawh kisai mipil U Win Naing genna ah Chindwin gun tui a khangna tawh kisai-in, Kachin gam Tanai khuapi zongah lauhuaina dinmun val tungta a, Manta mel (khayan yaung ) dinmun hong tung thei dinga, Kalewa khua sungah lauhuai tehna (Red) dinmun tungto ta hi ci in theihsakna nei hi.
Hih Tui khanna tawh kisai in Kawlgam buppi ah a kithuak lai tak hi-in Bhamo, ShweKuu, Kata , Tabeikkyin , Khamti, Homalin, Phaungpyin, Mawlaik, Kalewa, Minkin leh Moekaung cih khuapi 10 sungah Gunpi tawh kinai aa teengte leh leitang mun niamna lam a tengte kiginkholh dingin Kawlgam khuahun lam vaisai pawlin tangkona nei uh hi.
Hits: 3