Sagaing Division, Kanbalu district sung a om Ukna buluh (SAC) galkapte leh Pyu Saw Htee-te gal phualpi 4 pen Mipi galkap (PDF) kipawl khawmte lakhin zo uh a, SAC galkapmang Lt. Col. khat leh Nautang kigawm 101 a hingmat banah SAC galkap 96 si-in, 38 liam uh cih thu NUG, Military Region 1, pawlin February 11 ni-in tangko khia uh hi.
Mipi galkap (PDF) pang khawmte in Kanbalu district sung a om Kotoungbo, Pegyi, leh Ngapyodine khua banah Kyun Hla district sung Indine khuanote lakhia zo uh hi. Pegyi leh Ngapyodine khua pan galkap mang Lt. Col. Aung Myo Oo leh nautang 101 te hingmat uh hi.
Tua banah galvan nam tuamtuam mal 187, thauvui thautang 24,652 leh bomb-tang 530 zong ngah khia uh ci hi. Hih kikapna pen SAC galkap pawlin galvan tam pen a suplawhna / tan lawhna uh hi dingin gen uh hi.
Ukna buluh (SAC) galkap pawlin hih phualpite a khahsuahlohna dingin gal vanleng (Jet fighter, Y-12, Gyrocopter) le Kamikaze kici drone zangin 41 vei bang vanlam pan bitna bawl uh himah leh Mipi galkap (PDF) pawlte in tua district buppi la zo uh ci hi.
Kanbalu district kici pen Shwebo-Myitkyina lam zinpi tungah om hi-in, Kachin gam lam a om Ukna buluh (SAC) galkap pawl nek le dawn puakna lamzinpi ahi hi. Kotoungbo leh Indine khuate a lakkhiat zawhna hangin SAC galkap pawl thaguipi kitat suak hi, ci-in galvai thukanciante in genkhia hi.
Hits: 2