Karenni State (Kayah State), Bolakhe Township, Nangphe khuano kiang a om SAC te’ galphualpi khat ahi Mesalaung Hill pen Karenni Defense Forces (KNDF) te in busim in lakhinzo taktak ta cih thu KNDF thunei khatin genkhia hi. Hih Measalaung Hill kidona pen abeisa June 19, 2024 ni akipan hi-in, ni 7 cin khit June 25, 2024 ni zingsang lamin lakhiazo taktak uh hi.
“KNDF te in Measaung Hill Camp kimkot pan a um cih khit ciangin a kilakhiazo suak hi” ci-in KNDF thunei pa in genkhia hi. Ahih zongin SAC galkapte mi bangzah si, liam cih akipan galvan thauvui thautang bangzah kingah cihte kiciantak kithei nailo hi ci-in KNDF thuneiten genbeh hi.
Bolakhe Township sungah Mesalaung Hill pen SAC te’ galphual thupi mahmah khat hi-in, a zomah Fruso Township a om The 14th Military Advanced Training School pen a lian nihna ahi hi. Hih SAC galkap sinna Training School zong galvai ah a thupi mahmah Camp khat ahih manin, lakkhiat mengmeng dingin hanciamna nei uh ci hi.
” Mesalaung Hill lakna pan SAC galkapt misi luang leh thauvui thautang tampi kingah a, KNDF makaite in a sawt loin, thu suahna hong bawl in teh” ci-in Karenni galvai tawh kisai thunei khatin gen beh hi. Mesalaung Hill pen Shan State sung aom Military Operations Commands No. 2, khutnuai aa om Battallion leh Bolakhe Township pan akilakhia Battallion te kipawl uh ci hi.
Mesalaung Hill pen 2023 kum January kha in Karenni Defense Force (KNDF)te in khatvei la ngei khin uh hi. Ahi zongin SAC Galkapte lam pan a leh do-kik uh ciangin, KNDF te kihemkhia uh ahi hi. Tulaitak bel SAC te’n Karenni State sungah a khahsuahsa uh mun leh phualte a lakkik zawhna ding a hanciamsan mahmah laitak uh ahi hi. Shan State, Loikaw khuapi akipan Shan State leitaw lam leh Karenni (Kayah State) kikal mun tuamtuam ah nisim phialin kidona om den hi.
![](https://tongsan.org/wp-content/uploads/2024/06/449149692_805283398337121_3365320820766370785_n-2.jpg)
Hits: 1