Sagaing Division, Kalay Town, Tat Oo Thida veng ah Sept. 8, 2024 ni-in khua sung vak khangno 2 pen Ukna buluh (SAC) te’n thusit banah Motorcycle, Phone leh sum cihte ngen uh cih thu mit tawh a mu ngiat khuasung miten gen uh hi. Khangno pasal khat ii phone sutin a vel sak dikdek khit ciangin, tu/ ding (Standing and Sit down) 100 vei hih sak banah Motorcycle leh phone sutkhia uh ci hi.
A dang khangno khat zong a Phone a etcian sak dikdek khitteh a phone sung a om Kpay sungah sum Ks. 40000 teng nangawn lakhia / thohkhia sak in, a phone leh sumte sutkhia mang ci-in, amu khuamiten gen hi. “Pasalno khat zong tu/ ding (Standing and sit down) 100 vei val hih sak hi. A phone leh a sum neih sun teng sutkhia lai zen. Cycle nangawn galkap Mawtaw tungah koihto ziau uh hi. Min Kyi hotel kiang Hnin Thet Thet Wai store mai ciang dong mi ban sit suk ngekngek uh hiven! Kalay khuapi sung ah SAC te gamtat sia mahmah uh a, Thau nangawn tawh kap sawmin tawn bawl lai uh” ci-in Kawlpi khuamite khat in gen uh hi.
Abeisa ni 1, 2 sung tengin zong Dah Kah Sah zumpi kiang a om Min Kyi Hotel ah zintung khuazin mi 2 te zong SAC te mahin a phone suhkhiat sak uh ci hi. September 9, 2024 nitak lamin zong Singunau veng, Sai khua lamka bom kiangah Ukna buluh (SAC)te’n khua sung vakte lim sit mahmah lai uh ci hi.
Hits: 1