Chin State, Tonzang Township , Tonzang khuapi ah abeisa June 13, 2024 sungin Chinland Council (CC)pawl ahi CNA & CDFs te’n amat uh Guihtheih, khamtheih zatui sahban bawm 1100, (5500 Kg) agik December 31, 2024 ni zingsang (10:30am) hunin CNF Headquarters, Victoria Camp ah suksiatna / haltumna nei uh hi.
Tua khamtheih Zatang man ding akisehna ah bawm 1, ciangin India sum Rs 1000 in tuat uh a, a vekpi manzah a kituatna ah a tawm pen India sum Rs. 10,000,000, (Tengza val) hi dingin gen uh hi. YMA makaite’n a genna ah saban bawm khat a hoihte ( Rs.2000 – 3000 ) kikal hi dingin seh uh a, abeisa June 2024 kha sungin akiman hi a, December kha kikal bekbek ah a zah tampi kangto ta dingin gen uh ci hi.
Tua khamtheih suksiatna / haltumna hunah Chinland Council & Chinland Government makaite akipan India gam Mizoram State ah Khangno kipawlna lianpen Young Men Association (YMA) leh Farkawn VCP te zong samin kihelthei kim uh ci hi.
Hih khamtheih zatangte pen beisa June 13, 2024 ni-in, Chin State, Tedim khuapi pan Tonzang khuapi lam zuanin, Mizoram lamah lutpih ding akipuasuak ding kim lai Tonzang khuapi ah CNA & CDFs duty te’n a matkhiat uh ahi hi. Mawtaw hawlpa (Driver) Pu Theu Khan Tuang ii tapa Pa Mang Lian Piang pen akimatkhit kha 6 khit November 29, 2024 ni-in kikhahkhia kik ci hi.
Mizoram State ah Khangno kipawlna lian pen ahi YMA in zong hih khamtheih guihtheih zatui suksiatna leh khaktanna tawh kisai in, Mizoram Police, NGO leh mipite tawh mapang khawmin matkhiat den ding a lunggulhna uh pulak uh hi. CNA & CDFs pawl tuamtuamte in Mizoram lut ding hong matkhiat uh hih bang pankhopna a thupitnate genkhia uh hi. Tua banah Chinland Council CNF /CNA in zong mai lam hunah hih bang mahin khamtheih guihtheih tawh kisai Mizoram leh Chinland mipite mapankhop toh zel ding mipi tungah ngetna nei uh cih kiza hi.
Hits: 4