Tanintharyi Region, Thailand leh Kawlgam gamgi Mawtaung khuapi a om Ukna buluh (SAM)te’ galphualpi pen KNU /KNLA makai in, kipawlpihte tawh tuni November 14, 2025 ni-in buluak khia bek tham loin, SAM galkap 43 valin hingmat uh a, thaupi MM-120 namte 2, thautang 187, machine Gun 1, 60mm lawng 3, RPG lawng 2, Ngasa mei (Fish tail) mal 1, thauneu mal 36, leh thauneu nam tuamtuam a lompi in ngah khia cih thu Force for Federal Democracy -FFD te’n pulakkhia uh hi.
Mawtaung kikaptuahna tawh kisai-in November 11, ni akipan kikapto hi-in, tuni November 14, 2025 zingsang tungin Mawtaung khuapi SAM te’ gal phualpi (Camp) kilakhiazo banah Mawtaung khuapi zong kilutzo in thuneihna kineizo taktak ta cih FFD Drone Force pawlin gen uh hi. Hih Mawtaung galphualpi lakna ah Karen National Liberation Army (KNLA) Brigade (4) makai-in, The Karen National Defense Force (K.N.D.O), the Htet Se Myaew Ward, the People’s Defense Force (P.D.F), Burma People’s Liberation Army (B.P.L.A), FFD Drone Force leh Revolutionary galkapte kipawl khawmin gualzawhna lathei uh cih thu FFD te’n genbeh hi.
Thailand – Myanmar gamgi ah sumlutna phualpi khat hi-in, abeisa kum 35 sung Kawlgam galkapte’n a ukcipna pan tuni November 14, ni in Mipi galkapte’ khut sung atung thei taktak suak ci hi. Hih Mawtaung khuapi kikapna ah SAM galkapte a tawm pen 50 val Thailand gamah taimang uh a, Thai kumpi thuneite in, a Thaute uh sutkhia in hehpih huaisa uh ahih manin kem cing phot uh cih thu gamgi a om Thuthak saite’ tung pan kiza hi.
Hits: 3