Shan State leilu lam Myaukme khuapi ah zanni June 25, 2024 ni akipan Ukna buluh (SAC) te leh Ta-ang National Liberation Army (TNLA) te nasiatak kido uh a, SAC No (1) Military Operations Commands (MOC) ii khutnuai aa om galkap 17 te’n a thautawi uh khia in, TNLA te’ tungah kipumpiakna (Surrender)uh Taa’ng National Liberation Army (TNLA) pawlin tuni June 26 ni-in Social Media tungah khahkhia uh hi.
“Kyaukme khuapi ah SAC galkap group 4 om hi. Khuapi lutna lamah Artillery battalion om uh a, ahi zongin tua munah mi kua-mah omlo hi. Mualtung lam ah bel Infantry Military (501), (502) leh No (1) Military Operations (MOC-1) te a kizom in om uh hi. Tha leh ngal akipan lungsim hansanna leh Galvan lam ahi zongin kikhai mahmah mawk uh ahih manin, sawtvei dozo dingin lam-en keng” ci-in Shan State a om political analyst khat in gen hi.
Tu zingsang nai (8:00am) kiim aa kipan in Kyaukme lamka aa om SAC Artillery battion 352 kimah nasiatak kidona om in, sunlam ciangin Zato lam eh Artillery battalion te omna mun teng TNLA pawlin sutkhia zo uh cii-in, khuami khat in gen hi. Kyaukme Police station zong TNLA leh PDF kipawl khawmte in sim khawm uh a, police station tawh a kizom Panpawlay leh Yankin veng sung tengah kikapna nasia mahmah lai hi ci-in khuamite in genbeh uh hi.
TNLA pawlin a hingmat uh SAC galkap 17 te’ Video clip leh a kidona thute tawh kisai SAC Council lam panin gencianna bang mah om nailo hi. Kyaukme khuapi sung ah SAC leh TNLAte ni 2 sung akikapna hangin, naupangno khat leh khuami 6 si in, mi 10 liam cih thu khuamite in genkhia uh hi.
Hits: 4