Bago Region (western), Letpadan township, Thayet Chaung village ah galsim akuan Ukna buluh (SAC) galkapte pen October 15, 2025 ni zingsang lamin Revolutionary Joint Force (PDF) pawlte in pang simin, kap uh a, SAC lamte 15 si-in, 12 hing mat cih thu NUG Defence zumpi (National Unity Government (NUG) Defense Ministry)te’n pulakkhia uh hi. Tua kikapna ah Ukna buluh (SAC)te a panpih khuami galkap (militia) te leh Police te kihel uh a, nai 1, sung bang sawt ci-in PDF pawl pan Commander of Operation Area No. (2), Comrade Tin Oo, in gen hi.
Kikapna sungah Thau namkim lawng 19 leh thavui leh atang akipan galvan zat tuamtuam ngah khia uh hi. Galmat 12 te pen khangno vive hi uh a, a tamzaw pen zawh thawh thu tawh galkap dingin kimante vive ci hi. Revolutionary PDF lamte bel a si aliam omlo ci-in Comrade Tin Oo,in genbeh hi.
Tua kikaptuahna pen NUG People’s Defense Army, Operation Area No. 2, Bago Region Military Headquarters, Strategic Command 22te makai in, 3802nd Battalion, 3803nd Battalion, Shwedan Myay People’s Defense Force, leh Galun People’s Defense Force teng kipawlkhawm uh ahi hi.
Abeisa October 1, 2025 ni-in zong Letpadan Township, Mhaw Inn Oh suh, Kanpyogyi village kiangah SAC galkap leh police kigawm 20 kim PDF pawlin pangsim in nasiatak kikapna om a, 2 si-in, galvan pawl khat ngah uh ci hi. Bago Region (Western), Gyopinkauk township, Thayarawaddy district zongah abeisa September nipi kal sung akipan Thaupi leh Drone tawh SAC galkapte’n nasiatak kap in, gal mai nawkna nei uh cih kiza hi.
Hits: 2