Zomi Music Uplift Society (ZOMUS) makaihna tawh Season 3, ci-in Global Zomi Lengthe 2025 (GZL 2025) leitungbup Zomi lasa siamte kidemna pen July 24-29, 2025 sung Kuala Lumpur, Malaysia gamah thupitak kibawl hi. Tua lasa siamte kidemna ah leitung gam (7); Myanmar pan mi 4, India 4, Malaysia pan 5, USA pan 3, Australia pan 2, Europe pan 1, Singapore pan 1, vekpi gawm lasa siam (Contestant Winner) mi 20 paikhawm thei uh cih kiza hi.
Tua bangin a gamgam pan lasiam teelcing (Contestant Winner) tengin July 24-29, 2025 sung Global Zomi Lengthe 2025 (GZL-2025) min tawh Agape Zomi Church ah nasiatak kidemna nei uh a, tua kidemna pan mi 5 (Top 5) tengin Grand Final kidemna pen July 29, 2025 ni-in HGH Convention Center Sentul, Kuala Lumpur, Malaysia ah thupitak nei leuleu uh hi. Top 5, teng kidemna pan Thalmual khuami, Pyidawtha khua suak / khangkhia ahi Lia Huaisen in Global Zomi Lengthe 2025- Winner ngah in, sum USD 10000 leh pahtawina Trophy ngah hi.
Tua banah Zomi sungah laphuak / lasa siam minthang masate hong nusiasate pahtawina (The Evergreen Award); A dam lai kum tam khin Guitar leh laphuak / lasa siam minthang masate pahtawina (Lifetime Achievement Award) cih bangin mi 15 te pahtawina piakkhiatna nei cih kiza hi. Hih Global Zomi Lengthe 2025- Grand Final hunah mipi a pai khawm vekpi 5000 bang kipaikhawm ci hi.
Global Zomi Lengthe 2025, Grand Final hunpi sungah Zomi Guitar siamte ahi; Zalian, Bony, Jekhe, Khuppi, etc. banah Laphuak/ lasate ahi; U Sing Za Mang, Kam Za Tual (Siyan), T.S. Khai, Lengtong Pauno, Agape Itna Late; Fisher Quartet cihte pan lasate ” The Evergreen Award” kipia hi. Tua mah bangin Music lam Bassist siam madawk masa a dam laite sungah Pa Gin Suan Cin @ Cinpi (Lazy Club), Pa Cin Khan Pum (Emperor), cihte akipan guitar siam mi 25 valte The Evergreen ZOMUS Award piakhia hi.
Hits: 6