Chin State leitaw lam a om Matupi khuapi lakna pan Ukna buluh (SAC) galkapte’ neihsa galvan tampi kingah khia hi ci-in Chin Brotherhood Alliance in July 1, 2024 ni in Photo tawh kiciantak tangko khia uh hi. Hih galvante khempeuh pen Matupi khuapi ah phualsat a om Ukna buluh (SAC) galkap Camp thupi mahmah khat ahi Infantry Battalion 304, leh Light Infantry Battalion 140 te kiang pan kingah ahi hi. Tua galvante pen 14.5 ZPU kici Vanlengkapna thaupi 2, Howitzer thaupi, Launcher , khuttawi bomb tang lompi, adang thaupi leh thauvui thautang tampi ahi hi.
Matupi khuapi SAC galphual ahi Infantry leh Light Infantry Battalion te pen ni 20 sung tawntung buluhna leh kikaptuahna nasiatak akineihkhit uh ciangin, Chin Brotherhood Alliance pawlin a lakhiazo uh ahi hi. Chin State sungah Chinland Council (CC) leh Chin Brotherhood (CB) kici SAC Galkap a do / akap Chin resistance forces kipawlna nam 2 om uh a, Chin Brotherhood Alliance pawlin SAC Military Strategy leh battalion te a lakhiazo masapen ahi hi.
Chin Brotherhood pen abeisa 2023 kum December 30 ni in kiphuan khia hi-in, June 30, 2024 ni in a kiphuat khiat zawh kha 6 cing ta hi. Chin Brotherhood Alliance sungah Chin Defense Force (Mindat), Chin National Organization (CNO), Zomi Federal Union (ZFU), Chin Defense Force – (Kanpelet), Chinland Defense Force Matupi – Brigade 1, leh Mara Territorial Council (MTC) cih kipawlna 6 teng kigawmkhawm uh ahi hi.
Chin Brotherhood Alliance akiphuat zawh kha 6 khit ciangin Mindat township sung a om SAC te’ galphual lianpi Ma Kuan Eain Nu, Kanpelet township pan Kyindwe leh Matupi khuapi cihte lakhiazo ta uh hi. Ni 20 bang a sawt kai Matupi khuapi lakna /kidona ah Chin Brotherhood tawh Arakan Army (AA), Yaw Army (YA), Yaw Defense Force – YDF te kipawlin galdo khawm uh cih thu June 29, 2024 ni-in Chin Brotherhood Alliance te’n thusuahna leh tangkona nei uh hi.
![](https://tongsan.org/wp-content/uploads/2024/07/449683273_808468321351962_1911854685157867957_n-2-1-1024x1024.jpg)
![](https://tongsan.org/wp-content/uploads/2024/07/449683589_808468354685292_3547645995096919661_n-2-1-1024x895.jpg)
![](https://tongsan.org/wp-content/uploads/2024/07/449519590_808468418018619_6089229102940440028_n-2-2-1024x882.jpg)
![](https://tongsan.org/wp-content/uploads/2024/07/449687813_808468361351958_5948856681456753603_n-2-1-1024x597.jpg)
Hits: 1