Chin State, Mindat khuapi lakna Chin Brotherhood ii gal mainawkna sungah Monyua District No. 3, battalion zong kihelthei uh a, gualzawhna tawh inn lam zuanin a ciah galkapte pen Monyua mipite’n nasiatak muakin vaidawnna nei uh hi. Falam – Mindat khuapi lakna pen abeisa kum November 9, 2024 ni akipan a, December 21, 2024 ni-in lakhiazo taktak ta uh hi.
Mindat khuapi lakna sungah Chin Brotherhood leh a pawlte Sagaing Region, Monyua District No. 3, battalion, galphual neu 2,People Defense Force leh Yaw Defense Force (YDF), Yaw Army (YA) cihte kipawl khawm uh hi. Mindat khuapi lakna kidona sungah Monyua District battalion No. 3, pan galkap 7 in hong nusia uh a, 14 liam in, tua sung pan 5 te nasia liam mahmah uh cih thu Battalion 3, Company 2 Mahauurar Dragon PDF thuneite’n gen uh hi.
Chin Brotherhood galmai nawkna sungah Mindat, Falam leh Kanpelet khuapite pen belpawlpihte tawh kilakhiazo banah Mindat khuapi a kido khit ciangin belpawl pih ahi Mahauurar Dragon PDF pen Chin Brotherhood pawlin gallam tawh kisai galhiam tuamtuam ahi; G3-mal 10, G3 Box 30, G3 Thautang 2000 cihteng ngah khia uh ci hi.
Mindat khuapi lakna pan a galphual (Camp) nusia in a taimang SAC galkapte pen Chin Brotherhood pawlin hamzon uh a, 100 val kimankik zo cih thu Chin Brotherhood thugenpi Salai Yaw Mang in gen hi. Mindat – Falam khuapi lakna sungah SAC galkapte 170 kimin Galvan khia in, kipumpiak (surrender) uh ci hi.
Hits: 9