Myanmar gamah Beng (opium) ciinna / bawlna tawh kisai United Nations (UN) in December 12, 2024 nimit tawh thusuah a bawlna ah abeisa 2021 khit akipan kiam lam manawh lo ahih manin, Myanmar gam pen leitung ah Beng (opium) a tam ciing / abawl penpen sazian ah om ta ci-in pulakkhia hi.
Beng (Opium) pen Myanmar sung galkapte’ tunzawhlohna mun gammang tulak /taampi kawm gamgi dung cihte ah nasiatak kiciing / kituh a, tua Beng ciingte sungah a tamzaw Mualmite hi uh a, gamnuai mi Thau tawite tawh kizom in Zakang (Heroin) a suakna ding huan uh a, Myanmar leh Asia, leitung gam tuamtuam ah guk zuak uh hi cih United Nations Khamtheih Lam Vaisai Pawl (UNODC)) in gen hi. Gam sung leh tual sung kumpi thuneite in lah Dollar billion aman ding hih Beng tawh sumbawlna pen kitheihloh bawl uh ci-in UN in thupulakna ah gen hi.
Afghanistant gam a om Taliban kumpi in Beng (Opium) ciinna leh nasepna tawh kisai nasiatak a suksiat khit nungah abeisa 2023 kum akipan Myanmar gam pen leitung ah Beng (Opium) a tam ciing pen (kua ma dem zawhloh) dinmun ah madawk ta hi. Abeisa 2023 kumin Myanmar gamah Beng (Opium) vekpi Tons 1080 bang kibawl/ kingah khia cih thu UNODC) in ciamteh uh hi. Tukum 2024 sungin Myanmar gamah Beng Tons (995) kibawlkhia ta ci-in UNODC) in genkhia leuleu hi.
Hih bangin a beisa kum sangin tawm a kiamzawkna zong bel Beng kilimcinna munte ah Gal kidona khauh pai luatna hang hilel hi ci-in UNODC pan thukan makaipi Mr. Inshik Sim (Research Officer) in December 12, 2024 ni-in Thailand, Bangkok khuapi a kibawl News Conference ah pulakkhia hi.
Myanmar gamah Beng (opium) ciinna / tuhna a tam penna mun pen Shan State hi-in, gambuppi ii Beng cinna (80%) kim bang ahi hi. Tulaitak dinmin ah Shan State ah gal kidona nasia mahmah ahih manin, Beng (Opium) nasem / lokho tamzaw in Lokhawhna nusia in galtai mang uh cih thu 2024 kum Kawlgam bup Beng tawh kisai Thukankhia pawl (Myanmar Opium Survey 2024) in gen uh hi.
Gamgi zul mualdawn kuama tun zawhlohna mun leh lampi haksa munte ah Tuk hun sungin Beng kicingte hoih zolo ahih manin, a piang ding zah piang zolo ci hi. Ukna buluh (SAC) ii Ministry of Home Affairs in Beng ciinna munah thuneite zong sakin a suksiatna kisam mahmah ahihna zong UNODC ten kiciantak genkhia hi.
Hits: 2