Abeisa 2024 January 1 ni akipan December 31, 2024 kikal kumkhat sungin Kawlgam bup galtaite akipan kim leh pam khua hun siatna hang tuamtuam tawh mi cimawh gentheite (The Ministry of Humanitarian Affairs and Disaster Management) huhna kipia vekpi 8 billion kim (7.7) val kipiakhia hi cih thu January 6, 2025 ni-in National Unity Government (NUG) in pulakkhia uh hi.
Hih huhna kipiate pen Sagaing Division ah Awn 3200 MKK val, Magwe Division- Awn 1700 MKK, Mandalay Division ah Awn 804 MKK, Bago Division ah Awn 500MKK, Shan State leh Rakhine state ah Awn 120 MKK val, cih bangin Division leh State tuamtuam ah huhna kipiakhia cih pulak hi.
Tua banah galvai tawh inn leh lo nusia galtaite’ ading Awn 5073 MKK, Kim le pam khua hun siatna hang a gentheite’ ading Awn 1,295 MKK, Galkidona sungah asi aliamte’ ading Awn 445 MKK, CDM lutte’ huhna Awn 80 MKK val, Gamvai tawh kiman Thongkiate leh a innkuante ading humanitarian base Awn 46 MKK cih bangin a tuamtuam tawh Nampi 8 in khen bawlin huhna kipiakhia ahihna genkhia uh hi.
Ministry tawh kisai ah 2024 kum sungin Khenpi zui, mun leh gam zui cih danin huhna akipiak banah kum 4 sungah SAC a do (Revolutionary) gualzawhna ding ngaihsutna tawh amau mun ciatah haksatna leh buainate a thuak mipite zong zahtakna leh pahtaakna kipia hi. I mabante ah lungkia loin Ukna buluh (SAC)te’ akizawh mateng khut khat tawi khekhat khai bangin doto suaksuak lai ding hihang ci-in, NUG in thapiakna nei hi.
Abeisa 2024 December kha ciangciang Myanmar gam buppi ah mipi 3 million valin Inn leh lo nusia in haksatna thuakte’ dinmun zong suksia semsem thei lai ding hi ci-in, UNOCHA in Janaury 3, 2025 ni-in tangko khia uh hi.
Hits: 0