National Unity Government (NUG) le Chin National Front (CNF) kihel mualmi thautawite in Kawlgam kikhelna ding mapang kipawlnate tawh thukikupna le thukikupna nei thei uh ahihna pen ASEAN makai Kawlgam vai palai Ms. H. E. M.A Theresa Lazaro in theihpihna leh kipsakna nei cih kiza hi.
Tua bek tham loin mai lamah zongin kipawlna tuamtuamte kikuptuahna neih tohtoh ding kisam hi, ci-in January 23 ni-in Reuters ah genkhia lai hi. Hih kikal sungin Philippines gam, Tagaytay khuapi ah kikup nawina bawl uh a, Kawlgam gamvai kipawlna tuamtuamte kihel uh hi. Tua kikupna-ah NUG palaite kihel ahihna thu Ms. Lazaro in gen a, CNF in amau zong akihelna thu pulakkhia hi.
CNF thuphuangpi Salai Van in, ASEAN makai thak panmun a lak zawh khakhat sungin kamkupna neih pen kipatna hoih hi a, maban lametna om hi, ci-in gen hi. Kawlgam tawh kisai Philippines kumpi ngimna maban ahi kido kilangpannate khiamsak ding, mihing nuntakna ding nek le-taak tawh huh a panpih zawh nading, le gamvai tawh kisai kamkupna ding lampi hon sak ding, cihte ahi hi.
Tulaitak SAC in khen thum suahin abawl kiteelpi tawh kisai pen ASEAN palai Lazaro in kitelna thukimpihlo ahih hangin a piangkhia thute le gamvai kikhelnate etcik dingin genkhia ci hi. SAC bawl kitelpi ah mee khia mi a tawm hangin SAC galkap kumpi in lawhcing hi, ci-in tangko veve uh hi.
USDP party in gualzo uh akicih uh hangin UN le leitung gam tuamtuam in hih kitelpina pen kikhemna tawh kidim hi, ci uh hi. 2026 kum ASEAN kal helh makaipi panmun pen Kawlgam hun hi a, gam buaina hangin kisotto / kipelhsak phot in Philippines gam in luah sak ta uh ahi hi.
Hits: 2