Zomite’ sungah a om ngei nailo Political Party thak khat ahi Zomi National Party (ZNP) pen Pa Thang Sian Khai (Banzaal), MP Pu Pau Lun Min Thang ii naupa’ makaihna tawh kiphuankhia a, Ukna buluh (SAC) galkapte’ makaih Union Election Committee (UEC) tung pan theihpihna / ciaptehna (Registration) a ngahna dingin July 3, 2025 ni-in ngetna nei uh cih SAC te’ Thukizakna (The New Light of Myanmar) pan tangkona nei uh hi.
Hih Zomi National Party (ZNP) pen abeisa June 24, 2025 ni-in Party dinkhiat theihna ding phalna kipia khin hi a, tua ni akipan ni (30) sungin Political Party Registration bawlna ding thukhun No.7, (Accordance with the Political Parties Registration Rule 7) tawh kituak in, ngetna nei khin uh ci hi.
Zomi National Party (ZNP) phut theihna dingin Union Election Commission (UEC) tungah abeisa April 30, 2025 ni-in ngetna kinei masa ci hi. Hih ZNP party pen Zomi sungah lasa, Video limtang kineihsiam khat ahi Pa Thang Sian Khai (Banzaal) ii min tawh kisiau / kibawlkhia cih kiza hi.
Tuni ciangciang Ukna buluh (SAC) ii khut nuai a om Union Election Commission (UEC) ah Political Party phuh theihna ding ngetna a nei party 25 om uh a, tua sung pan party 19 te in kipsakna / theihpihna (Official Registration) ngah khin uh ci hi. Tulaitak ngetna a nei party 18 sung pan party 14 in Registration ngah ta uh cih hi. Adang party om laite in Registration theihna ding phalna ngen uh a, UEC in encianna / sittelna a bawl laitak uh ci hi.
Ukna buluh (SAC) galkap kumpi in hong tung ding December 2025 – January 2026 kikal sungah kiteelna (General Election) bawl sawm uh a, tua laiah Chin State pan Registration a ngahsa political party ahi; Khumi National Party (KNP), leh a ngen laitak ahi; Chin New Land Congress Party, Zomi National Party cihte kidem ding uh cih kiza hi.
Hits: 0