Shan State (Southern), Sisai khuapi pan ukna buluh (SAC)te’n amat uh Pa-O National Liberation Army (PNLA) galkap 4 te a vekpi un kaplum uh a, Online Social Media tungah a thahna Video tawh khahkhia uh hi. Tua PNLA galmat 4 te pen a khut nunglehen uh a, SAC leh Pa-O National Organization (PNO) galkapte kipawl in mulkim het loin, a banban in kaplum uh hi. Video file uh zong Online ah suaktatak kimu / ki-en thei zihziah hi. Hih thu pen abeisa January 12, 2025 ni a Sisai khuapi, Thison khuaneu gei kidona ah PNLA galkap 5 pen SAC leh PNO te’n man bek tham loin, January 13, 2025 ni-in nasiatak bawlsia in that lum mang uh hi.
” Tutung Online Social Media tungah kimukhia Video Clip pen tukum January sung a thu piang ahi hi. Tua a thahte uh pen ataktak ah mi 5 hi in, khatpa pen mundang ah that uh a, mi 4 teng pen Video sunga kimu mah bangin, mun khatah a banban in kaplum uh hi. Tua akithat mite in SAC galkapte’ puan dan silh uh a, ahi zongin a thatte pen SAC leh PNO palikte kipawl uh ahih lam kiciantak ka thei khia uh hi” ci-in PNLA thugenpi Ko Khun Rein Yan in genkhia hi.
Shan State (Southern) lam kidona sungah SAC galkapte leh PNO galkapte pen PNLA ten a matna thu kiza a, ahi zongin Galmat ngeina leh dan tawh kizui-in, bang mah cih loin limtak kem uh cih kiza ngei hi. ” PNO galkapte Major level ciang dong kimankha ngei hi. Ahi zongin amau danin bawlsia, thatlum cih dan khatvei zong kinei kha ngeilo hi. Galmat thukhun (Law) om bangin kikem hi. Ka mat khak uh Pa Oh Phungzite zong ka man uh a, hong thumna tawh kizui-in kikhahkhia kik ngei hi” ci-in Khun Rein Yan in genbeh hi.
Tukum January 12, ni a Sisai Township, Thisone khuaneu ah SAC galkapte tawh akipawl Pa Oh Miliia honpi tawh kikapna nasiatak om a, PNO Militia pan galkap hon makaipipa akipan galkap 20 val si hi. Tua banah tulaitak akikapnate pen minam kee tuamtuamte kidona cih bang hi loin, Ukna buluh (SAC)te a kibeisakna ding deihna tawh Kawlgam buppi ah galdona a om ahih manin, Galkap thuneihna limlim phattuamna omlo ahihna thu lungngai in mapankhop ding kisam ahihna Khun Rein Yan in genbeh hi.
Hits: 6