Rakhine state, nitumna lam Am khuapi pansan a om ukna buluh (SAC)te’ Western Region galphualpi akizang ding vui leh tang a puak SAC galvanleng khat pen November 10, 2024 ni sun hun pawl akilehkik lamah Arakan Army te’n kapsak ahih manin, Magwe Region Minbu District, Sitohthara gamhuam, Kanpauh khuata kiangah cihna ding thei loin, lozau khat bawh / tusuk ci-in, Kanpauh khuamite’ tung pan thu kiza hi.
SAC galkap lam thuthak sai lamte’ genna ah Am khuapi lam pan nitak lam (2:00pm) pawlin a leng khia Mi-17 Helicopter 2 hi-in, akhat pen kisia ahih manin, Kanpauk khua kiang Lo lai ah bawhsuk a, tudong tua munah om mualsuak hi ci-in Captain Yin Zaw in genkhia hi. “Vanleng bel buan gawp ahih manin leitoset khawng tawh kikuanin kibuaipih hehu ” ci-in genbeh hi.
Rakhine Galkap (AA) ten Am township sung a om SAC gal leh sa vai ah a poimawh munpi khat ahi, Taw Hein Taung kici SAC galphual pen nung June kha sungin buluh zo uh a, September 26 ni-in Am khuapi pan nitumna lam tai 10 a gamlatna pan Mea Taung galphual pen nasiatak kido a, October 7, 2024 ni-in kibulauh zo leuleu hi. Am Township sungah SAC gal phualpi 2 abei siang zawh nungah tu-in, hih Western Region Headquarters a buluak zawhna dingin Arakan Army (AA) in nasiatak a do ngekngek laitak uh ahi hi.
Hih Am khuapi lak zawhna ding kihanciam mahmah a, November ni 6 ciangciang galphual Engineer galkapte (BE), Infantry 373 pawlte, Infantry 371 te, galkap sung bit theihna ding leh galvan a kemcing pawl cihte khempeuh Arakan Army (AA) in ham zial mai khin hi. Hih Am khuapi pen Rakhine State leh Magwe Division kikal a om hi-in, Rakhine leh Chin mite a tenkhopna uh a, mi vekpi 120000 val pha ci hi.
Rakhine state lamah gal a kihuh ciangin a kitawn / akinawk den ahi Magwe division, Ngaphe township a om Am khuapi Padan lampi tungah Arakan Army pawlte’n phualsat uh a, Kawl galkap (SAC)te gal huh dingin a kuan sawm zelzel SAC galkapte khakcip zo uh hi. Tua manin Padan lam pen Kawl galkap (SAC)te ading bek tham loin, mipi galkap (AA)te’ adingin zong gal panna ding panmun hoih mahmah mun khat ahi hi. Tuma lamin zong Kachin galkapte (KIA), Kareni National Defence Force (KNDF), Karen National Union (KNU) cihte in Kawl galkap (SAC)te’ neihsa galvanleng Helicopter te kapkhiat sak ngei khin hi.
Tua banah abeisa January 3, 2024 ni-in zong Kachin State, KIA galphualpi omna Laiza khuapi gei ah SACte’ galvanleng Helicopter khat mah kikapkhia ngei-in, January 16, 2024 ni-in zong Shan State leilu lam Kutkhaing Township, Namphanka khua ah bom khia dingin a leng diaidiai SAC galvanleng khat mah KIAte’n kapkhiat sak hi. Tua Helicopter pen China gamgi pan nisuahna lam tai 8 gamlatna Wai Hmaw township Phawdaw huam a om, Kawl galkapte an puak a pai ci-in KIA ten gen hi.
Ukna buluh kipat cil lai May 3, 2022 ni pawlin zong Kachin gamke, Momauk township leh Kunlong khua kikal ah SACte galvanleng Helicopter khat KIA in kapkhiat sak ngei hi. Tua tungtang ah SAC galkap ulian 3 si hi ci-in May kha 7 ni-a kibawl thuthak kikupna khatah SAC galkap lam pan thunei ulian khatin im zolo-in genkhia kha hi.
2023 November kha sungin zong Karenni State (Kayah) Paroso township ah galkap vanleng khat mah KNDF pawlin kapkhiat sakin vanleng hawlpa Captain khat zong hingmat hi. Tua banah Karenni State sung mahah Nawlakhe gam-huam sungah 2023 July kha sungin zong, SAC gal vanleng khat mah KNDF te’n kapkhiat sak uh hi.
Hits: 3