Rakhine State, Ann township a om SAC Western Region Military Headquarters pen Arakan Army (AA) in alakkhiat zawhloh nading leh guallel akilehkik lohna ding SAC makapi huh General Soe Win in thupiakna nei ci-in, Nyipyitaw gallam thukan lamte’n gen hi.
Arakan Army (AA) te galdona hangin Ann khuapi kiim a om SAC te’ galphual leh Guard Station sang tampi tak AA pawlin lakhia khin bek tham loin, SAC galkapte in galvante khia in AA te kiangah a kipumpiak (Surrender) tampi om ta uh hi. Tua hi a, SAC te’ Western Region Headquarters pen Arakan Army te’ khut sung a tung petpet ding hita ahih manin, bangbang hita leh SAC galkapte’n taisan lo/ nusiat hetloh dingin SAC makai nihna General Soe Win in khauh tak thupiakna nei cih kiza hi.
Akisam galkap leh galvan kisamte vanlam pan ahi a, lei lam pan thaupi tawh ahi zongin lampi om bangbang in nasiatak puak ding leh hanciam mahmah dingin General Soe Win in a galkapte thapiakna nei ci hi. Hih Western Region Headquarters tawh kisai in, SAC – Vice Commander, No (3) Divisional Commander General Kyaw Swa Oo, Divisional Strategy Commanders, te khempeuh tung zongah thupiakna leh zaksakna nei ci-in, Nyipyidaw gal lam thukante in gen uh hi.
Abeisa August 3, 2024 ni in MNDAA in North Eastern Military Headquarters lakhia khin uh a, tu-in Western Regional Military Headquarters pen Arakan Army (AA) ten a lakkhiat zawhna ding hun nai mahmah ta hi. Arakan Army (AA) te’n gal kuanna hangin, Ann township sung a om Western Region Headquarters a om Colonel akihel officer te aliam abai leh a si zong tam semsem ta hi. Rakhin State, SAC commander of the military division (စစ်တိုင်းမှူး ဗိုလ်ချုပ်) ahi General Kyaw Swa Oo zong Western Region Headquarters nusia in Sittwe khuapi ah omin, galte dal zawh nading leh galhuh puak zawhna ding nasem in buai mahmah cih thu kiza hi.
Galhuh ding ahih thei bangbang in kipuak himah leh galphual taktak ah galhuh puakna dingin haksa ahih manin, vanleng tawh galhuhna mah thupi sak in vanleng tawh galvan leh nekleh dawn ding puaksak hi-in galvai lam thukante in gen uh hi. Tua ban ah, Ann township kiim aa gal kikapnate ah galkap kikaikhawm thakte leh galdo ding galkapte behlap zawhna dingin , SAC in lampi nam kim zongin hanciam mahmah laitak uh cih thu kithei khia hi.
Hits: 2