Rakhine State, Yathetaung Township, Tunrawai village (Old) pen tuni May 13, 2025 (10:00am) hunin ngongtat (SAC) te’n Jet fighter khat tawh pound 500 thahat bomb 2, va khiat uh a, Naupangte leh, nupi akihel khuami 13 in, mulkim huai takin nuntakna tanlawh uh hi.
” Tu laitak ciangciang misi luang 13 kithei hiphot! Hih a site zong a phual ah si vive uh in, si behbeh thei lai ding dinmun ah tampi om lai hi. Liamna ngah vekpi bel sazin kicianthei nailo a, 20 val kithei khia zo hiphot suak” ci-in, khuamithuthak lam saite’ tungtawn in kiza hi.
Tunrawai khuano ah SAC te tawh kizom/ kimeltheih cih zong omlo a, SAC in a ngim a tup sitset sa tawh kizui-in, Bomb pound 500 lb. thahat Tang nih a khiat uh ci hi. ” A liam abaite ahih leh bel a manlang thei leh akinaithei pen Zatote ah kipuakhia ziahziah hi. Hihte sungah lametna a tawm mahmah ta Emergency damlote zong kihel uh “ ci-in gen uh hi.
Arakan Army (AA) thugenpi U Khine Thu Kha in zong Yathetaung township, Tun Yawai khuaneu a bomb khiatna tawh kisai ah a si vekpi 13, a liam vekpi 20 val leh inn 12 kisia in kangtum cih thu Media tuamtuam in kipsakna nei ta uh hi. Tua a si 13 sung pan kum 6 pha pan pasal khat leh kum 10 a pha naupang khat leh nupite zong kihel ci hi.
” Ngongtat (SAC) te’n pound 500 gik bomb tangpi 2 hong khiat suk uh hi. Tua khua ah inn 200 kim teng uh hi. Gal cihte tawh kizopna nengcik zong a neilo khua zong hi. Khua mite khua phawk loin, aki-om hithiat laitak SAC te’n thakhat thu in, bomb a khiatsuk ngiau uh ahi hi. Tu’n tua Inn kizancip kawm ah misi luang kimukhia ziahziah a, misi sazian zong kibehlap thei lai dingin kilamen hi” ci-in Yathetaung khuamite’n gen uh hi.
Ukna buluh (SAC) te’n Kyauk Phew Township, Leik Kha Maw khuano zongah May 12, nitak lam (4:00pm) kim pawlin Drone bomb namte khiat uh a, Leik Kha Maw Buddist inn (Pagoda) meikang tum ci hi. Abeisa hun a zinlinna peuh paulap in, SAC pawlin tukha May 31 ni ciangciang Kikap/ kidona khawlsan ding genkhiatna a neih uh hangin, Rakhine, Sagaing Region, Karenni State, Karen State cih tengah nisim in Bomb khiat ziahziah lai veve uh hi.
Tua banah zanni May 12, 2025 ni zingsang (10:00am) kimin Sagaing Region, Depeyin Township, Ohh Theng Kwan khuano a om Sanginn pen SAC te’n bomb va khiatna hangin, Sang Siama 2 leh sangnaupang kigawm 22 si-in, 60 nasiatak liam uh hi.
Hits: 0