PDF Zoland leh abel pawlpih Chin Brotherhood (CB) te’ tangkona thusim loin, Ukna buluh (SAC)te’n zawhthawh thu tawh a bawl Census nasepna ah nasiatak ahuh / apanpih mahmah khat ahi Pa Kam Lian Thang @ Sia Thangpi, Tedim, Myoma pen October 4, 2024 ni-in PDF Zoland pawlin manin mun khatah kemcip uh a, thu om bangin thukhenna kinei ding cih kiza hi.
SAC bawl Census nasepna panpih khate peuh mah kuakua ci loin, hih bang mahin kiman dinga, kidopbawllo ding hi ci-in PDF-Zoland in tangko beh lai hi. “Amah (Sia Thangpi) pen Tedim khuanu khuapa makai muanhuai khat hi in, SAC Project 2, zongah nasiatak kihel hi. Abeisa October 1, 2024 ma deuh tengin Electrict Meter vai paulap in, Innkuan lai sitna (Census) vai zongah nasiatak panlakpih thapai ahih manin, tua hang tawh kiman hi “ ci-in Tedim khuami khatin genkhia hi.
Pa Kam Lian Thang @ Sia Thangpi pen Tedim khuapi leh Lamzaang khuaneu kikal lampi pan akiman ci hi. Abeisa September 30, 2024 ni-in PDF Zoland kipawlpih Chin Brotherhood te’n amau thuneihna mun (Aera) sungah Ukna buluh (SAC)te’ Census bawlna-ah akihel / a panpih peuh mah dopbawl lo ding ci-in Chin Brotherhood in tangkona nei uh hi. SAC makaih Census bawlna ah akihel / a panpih akitheihbeh leh tua bang mahin kiman dinga, nasiatak thukibawl ding cih thu PDF- Zoland in genkhia uh cih kiza hi.
Hits: 1