Naypyitaw Ministry Department zum tuamtuamte a cing a kem ding (Security force) kiciantak koih ta cih thuging kawm kalah Arakan, Chin leh Sagaing sung a om khuapi huam pawl khat bekah security kikoih ci-in SAC thugenpi General Zaw Min Tun in genkhia hi.
Tua banah November 16, 2023 ni Shan State leilu lam Karenni State, Loikaw, Arakan State a om Pauktaw khuapite zongah SAC te leh Revolution Alliancete kikapna tawh kisai-in, SAC te lunghimawh ta uh ahih manin, SAC Ministry department tuamtuam pan kumpi nasemte Galkap nasem (Security force) sem dingin thupiakna nei uh cih thu Nyipidaw khuapi a teng mipiten genkhia uh cih kiza hi.
“Tuni Naypyitaw a om SAC Ministry Department zum tuamtuam ah bitna lam (Security) tawh kisai kipawlna thak kiphuankhia cih thuging pen thumanlo / kidaisakna hi lel hi. Naypyitaw khuapi mipite kidongthei ding hi. Ministry department tuamtum ah nasemte in amau mun ciatah lungmuang takin sem uh hi. A diakdiak in daihna om lohna munte ahi; Sagaing Division khuapi pawlkhat, Rakhine State khuapi pawlkhat leh Chin State khuapi pawlkhat bekah hih bang a security sepkhiatna om cih gen nuam ing” ci-in General Zaw Min Tun in genkhia hi.
November 16 ni Shan State nisuah leilam Namhkam (နမ့်ခမ်း), Tamoenye (တားမိုးညဲ) leh Hopang (ဟိုပန်) khuapite ah Myanmar National Democratic Alliance Army (MNDAA) leh Ta’ng National Liberation Army (TNLA) in SAC phualpite Drone bomb khiatna leh Lauk kai (လောက်ကိုင်) khuapi huam Chinshwehaw (ချင်းရွှေဟော်) khua kiangah lang nih kikapna piang, ci-in Zaw Min Tun in genkhia hi.
SAC thugenpi General Zaw Min Tun in, “Hih langnih kikapna pen Kokang mihau Ming Xuechang (မြီရှောက်ချန်း) leh Sen (China) kumpi in mat dingin a khensat / thusuahna a neih uh mi 3 te Sen thuneite khut sungah akipiak khiat ma pekin thupiang ahi hi. Loikaw thonginn kimah zong kikapna om mah a, a langte nung kik uh hi. Moebye (မိုးဗြဲ) leh Demoso (ဒီမော့ဆို) lamah zong langnih kikapna piang hi. Myanmar-Bangladesh gamgi Rakhine lam bel Donnyo (ဒုန်းညို) palik zumpi kikapna zongah alangte nung kik uh hi. Tua banah Rakhine state sung mah ahi Pauktaw palik phual zongah Arakan Army (AA) in hong kap uh hi. Pauktaw khuapibup ka kem cip zo ta uh cih thukhahkhiatna zong nei zaw lai mah uh ” ci hi.
SAC galkap pawl leh palik pawl November 16 ni sun hunin Pauktaw a tun khit nungin, a lang AA pawlte nung kik uh a khuapi sung zong kikembit kik zo ci-in Zaw Min Tun in gen beh hi. Kawlgam bup huamah Revolutionary Alliance te’n SAC galkap phualpite leh Palik phualpite nasiatak a lakkhiat ziahziahna hangin, SAC zumpite lunghimawh mahmah ta uh aa, Nyipyitaw, Yangon leh Mandalay khuapite ah bitna lam nasep pawl (Security Force) zawh thawh thu tawh phuankhiasan uh hi.
Hits: 10