Sagaing Division, Shwebo township, Kan Gyi Taw khuaneu ah Catholic Father khat kithahna tungtang ah dahna lianpi kinei ahih thu leh a kithahna tawh kisai thuman akitheihkhiat mateng hanciam dingin National Unity Government (NUG), Ministry of Home Affairs zumpi in Feb. 17, 2025 ni-in thupulakna nei hi.
Hih Father pa kithahna tawh kisai-in, upmawh PDF thau tawi mi 10 te zong tua ni mahin thusitna kinei pah a, thu om zia tawh kizui-in, thukibawlto suak ding cih thu NUG in genkhia hi. ” Thukhen zumah kipuak in, thukhun om bangin thubawlna kinei ding hiphot hi. Tulaitak lian bel thusit dingte kisehsan laitak hi” ci-in NUG in genbeh hi.
“Mandalay Archdiocese huam sungah Pasian nasem Catholic Rev. Fr. Donald Martin @ Ye Nyaing Win (Kum 44), father suah zawh (Kum 7) pen Shwebo township, Shewbo leh Watlet kikal a om Kan Gyi Taw khua Luke Mary Church ah siampi (Father) nasem ahi hi. February 14, 2025 nitak lam (6:00pm) hun pawlin Thau tawi pawl khat ama omna Biakinn huang sungah lutin that lum uh uh” ci-in Catholic Media ahi Radio Varitas Asia of Myanmar (RVA-Myanmar) in genkhia uh hi.
Father pa omna biakinn huan sungah PDF thau tawi pawl khat lut uh a, Temta tawh a dawtna hangin a ngawng leh a nungzang ah liamma nasiatak tawh a si hi ci-in, khuamite’n gen uh hi. Rev. Fr. Donald Martin i luang hawm pen February 17, 2025 ni-in May Myo (Pin Oo Lwin) khuapi ah vuina kinei hi. Abeisa 2023 kum bul lamin Ukna buluh (SAC) te’n Kan Gyi Taw khua bulu uh bek tham loin inn tampi haltum ngei uh hi. Tukum 2025 February sungin zong SAC galkapte mahin Vanleng tawh bomb khiat kik zel uh ci-in khuamite’n gen uh hi.
Hits: 0