Karen State, Thailand – Myanmar gamgi neh a om SAC te’ galphualpi khat ahi Tebawboe Camp ah gal huh dingin akuan SAC galkap 70 val pen May 28, 2025 ni zingsang lamin Karen National Liberation Army (KNLA/KNU) leh a kipawlpihte’n buluak uh a, galkap honpi khat a sih banah 30 val hingmat in, honkhat mah Thai gamah taimang uh cih kiza hi.
” Gal huh ding akuan khempeuh bei siang himai! A kihingmat honpi khat om banah a galvante uh zong tampi kingah hi. Thailand gamah a taimang zong honkhat om uh ” ci-in KNLA /KNU galvai saite’ tung pan kizasawn hi. Tuni May 28, zingsang lamin SAC gal huh pawlte Democratic Karen Army (DKBA) headquarters, Sone Si Myaing kiang a tun laitak KNLA leh akipawlpihte in do khawm uh ahih manin, Camp buppi nusia mang uh hi.
KNLA leh a pawlte in Tebawboe khua mual tung a om SAC Camp leh Cacain Camp pawl khat khaktan in, nasiatak a dona hangin SAC pawlte in gal huh puak / kuansak uh ahi hi. Tua SAC galkap 72 kimte pen May 27, ni akipan KNLA pawlte’n khakcip in nasiatak do uh a, tuni May 28, zingsang tungin SAC gal huhte khempeuh a bei lawh uh ahi hi. SAC galkapte in Tebawboe khua, Kyauk khat, Taung Ni, Sone Si Myaing, Wale kim tengah SAC galkap a tul asim om ahih manin, Wale lampi dung pan gal huhte leh galvan puak uh cih kiza hi.
Hits: 2