Chin State, Tonzang khuapi ah CNA in lungsim manlo khangno khat manin thusitna a neihna pan si cih kiza hi. Tedim, Sakollam veng a teng Thangzang khuami Tg. Langh Khan Suan (Kum 29), Gualnam beh pen Tedim pan Tonzang ah apai Tungtuang khua nawl ah December 9, 2024 ni-in, CNF /A galkapten man uh a, December 10, 2024 ni zingsang in si cih thu PDF- Zoland leh CDF- Tonzang tangvalte’ tungtawn in kiciantak kithei khia hi.
Tungtuang khua nawl a om CNA galkap Gate cing pa in khawl sak a, Tg. Suanpi khawl loin paisuk hi. Dehin man kik pah hi. Tua CNA galkappa in ko, Tonzang Township Council zumah hong puak hi. Victoria Camp a Chinland Councul makaite’ Thukikupna (Meeting) kineih laitak ahih manin, kei om theilo suak ing. Ka om theihloh teng tawh CNA galkapte’n amau thu tawh Thong na khumin, thudotna a neih ciangin, Tg. Suanpi in dawng kik theilo ci.
Kammal khat bekbek pau in ” Mualpi khua ah Khaini va muam pak ding a pai pak hi ing” ci hi. A nung lam ciangin hihpa bel lungsim man phalo hi ngelngel ci-in, thu dong nawn loin puanza pia in lumsak phot uh ci hi. Zingsang khuavak teh Gate cingpa in a va et ciangin, i mipa sikhin ta veh ee” ci-in CDF- Tonzang makai Pu Thang Suan Mung in gen hi.
Misi luang pen a innkuante kiangah kipuakkhin ci hi. Tonzang township sungah CNA commander tawh kikupna nei uh a, Zomi ngeina om bangin Innkuanpih, ulenau tawh kilemna leh kithumna nei thei uh cih kiza hi. ZFU (PDF Zoland) in a pulakna ah akiman Tg. Langh Khan Suan pen CNF galkap pawl khatin thusit in a vuak gawpna pan December 10, 2024 ni-in a nuntakna bei lawh hi ci-in December 11, ni-in thusuahna (Statement) nei uh hi. Khuami khatin a genna ah misipa tawh kisai CNA galkap makaite’n vaipuakna, panlakna a neih ding kisam hi. A bawlsia leh a thatte thukhun om bangin nasiatak thu bawl dingin ZFU (PDF-Zoland) in ngetna nei uh hi.
” A taktak in ci leng CNF galkap nautangte’ vuanna hangin a si suak ahih teh CNF makaiten zong tua mivua, mithatte thu a bawl ding kisam hi. Ko pawlin bel thu bawl kei nung! Amau kipawlna khat hibuang ahih teh Upadi om bangin, thu bawl huai hi. Hih Revolution hun sungah hih bang a khut khialhna om cih pen hoih hetlo hi. Mai lamah hih bang dan thute a om nawnlo nading kuakua kipawlna kidophuai cih gen nuam ing” ci-in ZFU (PDF Zoland) thugenpi in genkhia hi.
Misipa Tg. Langh Khan Suan in Malaysia gamah a om lai lungsim manlo natna hangin, a teenna Tedim khuapi ah a ciah kik zawh kum 2 bang pha khin ta ci hi. Tonzang township pen CDF- Tonzang leh CNA te in buluak in ukcip bek tham loin, khuapi khantohna ding akisam khempeuh zong nasiatak semin mapang san laitak uh hi.
Hits: 2