Sagaing Region, Kalaymyo pan Chin State lamah gal kuan ding a kuanto SAC galkapte honpi khat pen CDF-CDM Siyin, PDF Zoland. KKG kipawlkhawmte in May 21, 2025 ni zingsang (08:00am) hun pawlin Mualpi khua ah nasiatak kikaptuah uh a, tuni May 23, 2025 ni ciang dong tatsat loin kikapkap lai uh a, CDF-CDM Siyin pan tangval khat si-in, SAC lamte zong tampi mah si leh liam uh cih thu CDF-CDM Siyin te’n pulak khia uh hi.
Akikap masakna pen Mualpi khua hi in, tulaitak Theizang, Hiangzing leh Vomsem khuate ah lutto uh ahih manin, tua khua teng pan khuami kigawm vekpi 1000 val kim galtai uh ci hi. Hih galtai mipite’ ading annek tuidawn panpih ciat dingin CDF-CDM Siyin in huhna ngetsak ci hi. Abeisa May 18, 2025 ni-in Kalaymyo pan Chin State lam zuan in SAC galkap 200 val kuanto uh ci hi.
” Khuamite pawl khat bel a lemlemna khua kim khua pamah tai uh! Kalaymyo lam bel kitaisuk theilo suak ahih manin, a tungsiah lam ciang bekah kitaithei suak phot aive! Guah zuzu lai si tawh vai khat peuhpeuh lem het kei” ci-in, khuami khatin genkhia hi. Kalaymyo – Taingen mawtaw lampi i cih pen Kalaymyo leh Chin State leilu lam kizopna lamzikpi suak hi.
Sagaing zinlinna tawh kisai Inn le lo , mun leh gam kisiate puah leh zuun kikna ding ngaihsutna tawh May kha bei dong kikap/ kidona tawlngak phot dingin SAC kumpite’n pulakkhia uh himah leh khawl tuan loin, tatsat loin galkikapna a om suak hi. Hih Mualpi- Taingen,Theizang, Hiangzing kikapna hangin, Khamtung pan Kalaymyo lam khualzin gamvak ding mipite kikhakcip phot ci hi.
Hits: 7