Chin State, Tedim township, Mualpi khua ah abeisa July 5, 2024 ni-in, kum cing nailo Zomi numeino khat pen Ngongtat (SAC) galkap nih in zawh thawh thu tawh buan uh ci-in, Mualpi Khua mite in Tongsan Media ah genkhia uh hi. Tua ngongtat (SAC) galkapte pen July 5, 2024 ni zingsang (6:00am) kiim pawlin Kawlpi pan Zogam lamah Galdo dingin Mawtaw thum tawh a kuankhia uh hi-in, Mualpi Khua atun ma deuh un, a Mawtaw uh nusia in a khe uh tawh Mualpi khua lamah hong paito uh hi ci in Mualpi khuamite in gen uh hi.
Sun kim (11:00am) kiimin Ngongtat Galkap te Mualpi khua sung hong lut uh a, Khua sung inn tengah ban lutin a sitna pan Numeino nu amuh uh ciangin, zawh thawh thu tawh Buan uh ci in Mualpi khua mite in gen hi. Galkapte hong kuanna hangin Mualpi Khua mite taimang uh a, Numeino nu pen Anhuan in inn ah a om laitak Ngongtat Galkap nih in buan uh ci in Numeino nu tawh akinaipih Meltheih khatin gen hi.
“ Ngongtat Galkap (SAC) te Kawlpi pan Galdo dingin hong kuan khia uh cih ka zak uh ciangin, Khua sung mi khempeuh gam sungah kitaikhia mang pah hi. Ngongtat (SAC) galkapte’n zawh thawh thu tawh a buan numeino pen a Nu bek tawh om hi-in, Lau baih mahmah uh aa Gam sungah tai pah uh hi. Gam sungah a om zawh uh sawt pian ta ahih manin, Numeino nu a gil kial ciangin Inn ah an Huan dingin a ciah pak hiveh aw.! Anhuan ding Mei a tawh lai takin Ngongtat galkapte Khua sungah inn khat khit inn khat lutin a sit laitak tawh kituak sese ee! Numeino amuh uh teh Temta tawh Vau in Na Aww na ging sak leh hong that ding ci in Zawh thawh thu tawh Numeino Buan uh hita mai hi.” ci-in, khuamite’n genkhia uh hi.
” Tua banah Ngongtat (SAC) galkap Bo pa in a nautangte nih in tua bangin zawhthawh thu tawh numeino a buanna vai tawh kisai-in, Sum piak dingin gen hi. Ahi zongin tua liau sum a sannop kei leh numeino leh a buante nih tawh kitengsak ding ci ahih manin, Numeino zong lau ahih manin, a liau sum sang in gam sung lamah hong tai kik pah vingveng hi ” ci hi. Tua bek tham loin, July 5 ni mahin Mualpi khuasung ah Numeino kum 14 khat zong zawhthawh thu tawh buan dingin hanciam ngei lai uh hi ci in Khua sung mikhat in gen lai hi.
“ Tua zong ama tanu hi-in SAC galkapten tua Numeino pen a inn khan sungah lut pih in, kong khak kalhcip in, numeino ii Nu pen inn pua lamah om sak uh hi. Tua numeino zong lau in awng khia hih manin Galsim ding aa kuan SAC galkap Bo pa in a zak ciangin, bang thu om hiam ci in Inn pua lam a om, a Nu dongin, Anu in zong Galkapte’n zawh thawh thu tawh ka tanu Buan sawm uh hi cih a gen ciangin, khahkhia kik uh hi ” ci-in khuami khatin genbeh uh hi.
Galsim dingin akuankhia SAC galkapte pen 100 bang pha uh a, Mualpi Khua panin Zogam lam manawh suak nawn loin, July ni 5 nitak lam (5:00pm) hun pawlin Kawlpi lam zuankik uh hi ci in Khuasung mite in gen hi . Abeisa 2021 November 11 ni-in Akluai khua zongah Kum 30 gual kha sagih apha naupaii numei khat leh Kum 27 gual nausuak zawh a sawt nailo nupila khat Akluai khua ah galphual sat Tat Ma (22 ) nuai a om SAC Galkap te in Zawhthawh thu tawh buan ngei lai uh cih kiza hi.
Hits: 8