Myanmar gam, Rakhine State leitaw lam a om mun minthang khat ahi Ngapali Beach paina a kizang mahmah Thandwe Airport pen Arakan Army (AA) in zanni June 23, 2024 nitak nai (4:00pm) hun pawlin busim in lakhia zo uh ci hi. Thandwe Airport pen Ngapali Beach paina lampi kha bek omna mun hi-in, leitung khualzin mite’n limzat mahmah uh hi.
Hih Thandwe Airport leh Ngapali Beach dung suk teng ah AA galkapte munla in om uh a, tua kiim tengah kidona zong nasiatak om lai hi ci-in AA tawh a kinai mi pawlkhat in gen uh hi. “Ngapali Beach dung tengah kidona nasia mahmah lai hi. Ukna buluh (SAC) galkapte honpi khat taimang uh a, tai loin a dodo lai zong om uh” ci-in AA tawh a kinai mikhat in gen hi.
AA in airport nai a om SAC ii Infantry Battalion 566 leh Light Infantry Battalion 55 te do zomto lai uh ahih manin, Thandwe khuapi leh a kiim a paam teng ah kidona nasia mahmah ci-in, Thandwe khuami khat in gen beh hi. “Infantry Battalion 566 in zong do zo nawn kei in teh. Airport kilakhin ta ahih manin Gal huhna vante zong a tung nawnlo ding suak” ci in Thandwe khuami khat in gen hi.
Thandwe khuapi kiim leh paam ah kidona hangin khuamite tampi galtai uh a, khuapi sung lampi tungah kua mah om nawn lo phial in dai khipkhep hi ci-in khuami khat in gen hi. “AA te pen tulaitak Amazing Hotel kiang dong tung ta uh ci hi. SAC galkapte in tuzing (10:00am) hunin 55 battaion galphual kiimah Ngapali Traffic Point pan lampite khak cip ta uh hi. Zingsang nai 4 ma leh nitak nai 9 khitzawh khua pua ah kua mah paikhia / vakkhia theilo (Curfew) thukhun bawl uh hi. Tulaitak ciang dong Ngapali ah kidona kizom lai hi” ci-in khuami khat in genbeh hi.
SAC Galkapte in Thandwe leh Ngapali te a suplohna ding un Leilam, Tuilam, Vanlam galkap tampi tawh nasiatak do kik uh a, Tuipi lam panin gal tembawte tawh a kapna uh thaupi ging zong kiza ziahziah hi ci-in khuamite in gen uh hi. Thandwe Airport pen Revolution thautawi resistance groups te’n a lakkhiat airport masapen suak banah, tua airport lakna hang ah SAC in tampi suplawh dingin kigen hi.
Ngapali Beach ah galkapbute leh galkapte a panpih Mihau (Cronies) te’ neihsa Hotel tampi om hi. Tua zahkhat in tua mun pen SAC galkapte ii tawlngakna phualpi khat zong ahi hi. SAC Council in nung kum June kha sung aa gamsung galkikapna tuamtuam pan a liam a bai SAC galkapte pen Thandwe Airport pan Ngapali Beach ah puak in tawlnga sak uh hi.
AA in Rakhine State sung aa SAC galkapte omna phual khempeuh lakkhiat dingin tangko khia khin uh aa, Myay Pone, Minphyu, Mauk-Oo, Kyauktaw, Pauktaw, Rambe, Ponenar Kyun, Yateih Taung, Butii Taung leh Paletwa (Chin State) te lakhin zo hi. Tulaitak in Emm, Maungtaw, leh Thandwe aa om SAC galphualte a do san laitak uh ahi hi.
Maungtaw khuapi ah a om lai SAC galphualte do zomto lai ding ahih manun, tua kiim aa om khuamite ading lauhuai ahih man in June 16 nitak lam aa kipan a taikhiat mang dingin AA in mipite tungah thu zasak cih kiza hi.
![](https://tongsan.org/wp-content/uploads/2024/06/448734387_803720945160033_7158281323044212658_n.jpg)
![](https://tongsan.org/wp-content/uploads/2024/06/449085464_857300023099411_1632287386758932371_n-2-1024x545.jpg)
![](https://tongsan.org/wp-content/uploads/2024/06/449099276_857300633099350_1019542199788744908_n-2-1024x574.jpg)
Hits: 2