Sagaing Division, Kalay Township sungah galmai nawk ahi Ukna buluh (SAM) galkapte in Thanpho khua leh Hakha Lay khuate nih mei tawh hal sak uh a, khuamite 10000 val galtai mang khin uh cih kiza hiOctober 27, ni akipan Kalay township, Thuma khua GTC sangpi ah phualsat a om Ukna buluh (SAM) galkapte in Thaza Gone khua leh Kyun Chaung khua ah galmai nawk uh a, Kyunt Chaung khua mei tawh hal pah uh hi. October 30-31, ni-in Nat Chaung, Nat Myaung, Chaung Khuah, leh Hakha Lay khuate halsak leuleu uh ci hi.
Hih ukna buluh (SAM) te in Kalay- Gangaw Lamzikpi leh kalay- Falam lamzikpi kikal ah phualpi 2 tawh galmai nawkna nei uh a, akim apam a khuaneute ah lutin, khuamite’ neihsa sum leh pai, van manpha kicite laksak (gu) uh ci hi. Tua kawmkal ah langpang PDF, CDF te tawh kikap/ kido ngekngek uh a, SAM lamte a si, aliam tampi om uh hi. Ahi zongin SAM lamte’n a galkap behlap toto kawmin, galdona maban zomzom uh ci hi.
Tulaitak dinmun ahih leh SAM galkapte in Thauh Kyant, Kya Inn, Sitha, Nat Myaung, Nat Chaung, Cian tha, Aung Thaza leh Mandaw akipan akim apam a khuaneuteng pan khuamite 10000 a sim galtai ziahziah uh cih kiza hi. ” Kikap/ kidona ah SAM lamte a si tam lua peuh mahin, Battalion 228, pan galkap mawtaw (Fow car) tawh pua in Hankuang bawl se loin, phum suk mengmeng uh hi. Ulian lamte bel Kan Pale khua ah vui bawl sam uh hi. A si tamzaw Pyu Saw Htee leh galkap a lak thakte vive hipah mai hi. Misite bel galkap Mawtaw 3 tawh nawn ngekngek in, leito in phum suk ziauziau uh hi. Galkap bei kei ta uh ahih manin, a thak nawh laksan mahmah uh ” ci-in galkap lam Thuthak saite’ tungtawn kizasawn hi.
Hih Ukna buluh (SAM) pawlin galmai lim nawk mahmah uh a, langpang pawl PDF, CDF te tawh nisim kikaptuahna nasia semsem hi. PDF, CDF lamte zong galvan leh adiakdiak in Thautang kisam lua ahihna leh mipite’ huhna kinak sap mahmah cih kiza hi.
Hits: 2