Chin State, Tedim Township, Thuamvum (Kennedy Peak) tungah PDF Zoland in June 23, 2024 ni zingsang lamin amau Dialkhai (Flag) khaina a neih khit uh teh amau galphual satna Mual bup mahah Phualsat kik uh cih PDF Zoland makai khatin genkhia hi.
PDF Zoland vaisai khatin a genna ah, ” Hih Kennedy Camp tawh kisai omzia pen ko, PDF Zoland tangvalte in abeisa November 21, 2023 ni-in SAC te’ khutsung pan sutkhiazo hi ung. Abeisa June 21, 2024 (03:00am) hun pawlin Ukna buluh (SAC) galkapte in phualsat kik nuam uh ahih manin, kikapna nasiatak kinei a, nitak lamin ka etkik uh ciang Ukna buluh (SAC) galkapte na om nawnlo uh hi.
Tua bang kawm kalah June 22 ni mahin CNA khutnuai a om PDA galkapte in kuamah tawh kikapna bang mah omlo pi-in, Kennedy mual tungah kahto in CNA Dialkhai (Flag) vakhai mawk uh hi. Tua thu ka theih uh ciangin tuni June 23, 2024 ni-in PDF Zoland galkapte paipah in, amau dialkhai (CNA Flag) hemkhia in, PDF Zoland dialkhai (Flag) kikhai kik suak hi. Amau PDA galkapte khat zong om nawnlo in taikhia mangta uh hi” ci-in PDF Zoland thunei khatin genkhia hi.
Tedim khuapi Mualtuk SAC galphual pan galdo ding a kuankhia Ukna buluh (SAC) galkapte pen Thuamvum (Kennedy Peak) ah lut pak uh a, Taingen lamah paisuak uh hi. Taingen khuabup mei tawh haltum uh a, tua laiah Chinland Council tawh kidona nasiatak om cih kiza hi.
Hits: 3