Leitung pumpi omzia nisim kikhel vangvang in pilna, siamna le hauhnate akhantoh zahin siatna le lungkham huai lam manawh in pai zalzal hi. Tua mah bangin i kha lam thu zong Pasian deihna bang a nuntakna sangin, a lehlam vive nuntakna in thu-umite’ kha gamsung luah khin ta hi. Leitung omzia in ki-itna, nopna, daihna le kilemnate sangin, kimuhdahna, kikhenna le kithahnate in leitung tuamcip ta hi. Hih thute’ i lungngaih ciangin Laisiang tho genkholh thute hong tangtung hiaihiai hi-in, i Topa Jesu’ hong paikik ding zong zanni, sangin tuni hong nai semsem ahihna hong phawk sak hi.
Hih bang hun sia le hun gilo sungah ei Pasian thu-um Zomite’n i mimal, innkuan, khua leh tui, pawlpi ciat le i kipawlnate ah taksa leh kha lam dinmunte ngaihsut phat huai mahmah hi. Pasian in a bawlsa mihingte hong it luat manin, a tapa neihsun eite ading hong piakna thubulpi ahi Christmas hunte zong kumsim in i zangh zel hi. Christmas i khiatna/ deihnate thupi ngaihsun selo in, Christian ngeina danin bawlin i zangh thei tawntung hi. Zomi bupin hih Christmas thusim le a deihnate i thupitsak masiah minam le gam khangto kisuak theilo ding zahin a thupi hi.
Zomite pen Pasian in hong tuam it, a ma hotkhiatna thupha hangin thupha a sang minamte in a kiciamteh ngam minam i hi hi. Tua zahkhop in i minam sungah mipil, misiam le minthang tampi i nei khin a, tuate mahin biakna le kipawlna tuamtuamte ah hong makaih uh hi. I makaite akipan mipite khempeuh in minam le gam khantohna ding vive mah ngim le tuppi in kinei ciatin lungdam huai mahmah hi. Ahi zongin i khantohna ding thusim le thubulpite kalkhia / pholhkhia masa le telcian lopi in i vaihawm ngeingai zel hi. I makaite zong leitung thu le biakna thu ah kilekkim in thungaihsun vivete ahi uh a, amau makaihnate i zuih siam ding kisam mahmah hi.
Hih bang teng kawmkal ah leitung khuahun luanzia zui-in, a thupi mahmah khat ahi thukizakna (Media and Information) lam zong khuak i bat phakloh zahkhop in, nisim phialin khang semsem mawk hi. Tua bek tham loin, Social Media nam tuamtuam leh adiakdiak in Artificial Intelligence (AI) bang zong mihingte’ pilna / khuak theihna cihte kisam nawnlo zahin na khempeuh kidong thei/ sem thei dinmun hita hi. Hih Social Mediate in i mimal thutheihna / mit khuamuhna hong vaak sak banah minam dinmun nasiatak hong tawisang vengvang ahih manin, genloh le sutloh aphamawh Social Media te i zatsiam ding zong a thupi mahmah khat hong suak hi.
Hih Social Media i genna tawh kiton in, abeisa 2001 kum akiphuankhia Zomite’ thukizakna tuamtuamte’ sungah a masapen leh picing takin akihawmkhia ‘’ TONGSAN Journal” zong mipite’ mapankhopna tawh kisemkhia zo suak hi. Ahi zongin COVID-19 hang leh adiakdiak in Kawlgam guaina hangin, abeisa 2021 April kha sung akipan Kumpi thuneihte’ khaktanna tawh kitawlnga suak phot hi. Ahi zongin khua hun zui-in Social Media online panin ahithei zahzah in ” Tongsan Media Group” khat leh Tongsan Media page” khat kinei-in, thuthak tuamtuam a hunhun in kisuaksak zel hi. Tua banah Website: www.tongsan.org zong kinei-in, nasemte’ hun ngahna tawh kizui-in, thuthak tuamtuam leh Article thupite kikoih zel hi.
Tua hi a, Pasian deihna leh thukimpihna om leh mai 2026 kum ciangin, i Tongsan Media zong Kum 25 hong cing petpet ta ahih manin, Kum 25 cin phawkna Mualsuang ” Tongsan Silver Jubilee Magazine” kiciantak khat bawlsawm hihang. Tua laibu ah Thusun (Article) leh minam vai, gamvai, biakna vai, pilna siamna lam, khantohna lam, thugil tuamtuam kisuaksak ding hi. Tua ading mimal thu, sepna bawlna, biakna, khua leh tui gam leh nam a sukha thei Thu leh late ahi llo, thugil, thumanpha tuamtuam kipuakthei ding cih zong akizasak kholkhol suak hihang. Tongsan Magazine zong mai 2026 kum sungah pello hawmkhiat zawhna ding i thungetna hisak hang.
I Tongsan Media pen abeisa kum 25 sungah mipi thukizakna lianpen ahih zahkhat in, mipite’ huhna leh panpihna bek tawh kikalsuan ahi hi. Mai lam zongah Mipite mah tawh mapankhopna mah kisamto zel ding cih i pulak kawmin Tongsan Media Silver Jubilee Magazine vai kong Tangko khia uh hi.
Minam picing le a khangtote’n lai le pau kician nei uh a, tua a laite uh gelhgelhna bek tham loin, simsimna tawh zuunin kem ciat uh hi. Zomite zong tuhun lam ciangin Zolai a it le a zuun/ a puah nuam Khangthak kitam mahmah ta ahih manin, lungdam huai thu ahi hi. Tua manin i minam leh adiakin Zolai khantohna ding lampi tuamtuam tawh hanciam in a zun a puahzo ciat dingin Topa’n hong makaih ta hen!.
Deihsak Thupuak:
Zomi le Zogam khantohna ding muhna le theihna tampite’ sungah a nuai thubulpi nam (10) ahi ‘’PHOT PHOT NI’’ cih tawh thupuak thak khat pulakkhia nuam hihang.
(1) A nungta Pasian bulphuh in, ki-it sawm photphot ni.
(2) Pasian nasemte le i makaite zahtaak photphot ni.
(3) Thumaan le cihtakna tawh kalsuan sawm photphot ni.
(4) Pasian sumpi 1/10 (10%) mantak piak sawm photphot ni.
(5) Secular lam pilna lamah pilna neih ding hanciam photphot ni.
(6) Minam min sangin, mimal or mipite ki-it masa photphot ni.
(7) Biakna tawh kisai upna, sanzia, pomziate tawh minam kivaipuaknate kalsuanpih / gawm cip sawm kei photphot ni.
(8) Minam kipumkhatna a susia thei pau le ham, khua le tui, beh le phung le naamkee kipawlna neuneute ultungsak kei photphot ni.
(9) Jesuh Christ i lungdamna thupuak (mission) nasepna hanciam sawm photphot ni.
(10) Zomi le Zogam khantohna dingin mimal lungsim puakzia limlim kiphuahphat sawm in, innkuan-pawlpi le khua le tui ciat puahsawm photphot ni.
Hih a tung ateng tawh kibulpatsawm photphot leng a kisiasa le a pukcipsa i hawmthawh tawntung ahi i gam le i lei Pasian mahmah in hong damsak kik dinga, THUPHA NGAH MINAM LE THUPHA NGAH GAM hong suaksak pelmawh ding hi cih upna le muanna i nei hi. Topa Pasian aw… Zomi le Zogam thupha hong pia in!
Tongsan Tanute khempeuh tangin,
Sia Khampeek (Tongsan pu)
Chief Executive Officer
Tongsan Media Group Inc.
Contact to:
Email: khampeek@gmail.com
Whatsapp: 047-46824269
Facebook: Sia Khampeek Tongsan Pu
Hits: 12