Chin State, Tonzang khuapi busimna / lakna ah liamna a ngah SAC galkap 3 te CNA galkapte’n a kaplupna tawh kisai Online tungah Video tawh kiciantak kithei khia ahih manin, a thu omzia limtak kankhia a, thu bawl dingin Chinland Council in thusuahna nei uh hi.
Chinland Council, Defence Department nuai a om Chin Joint Force pawlin abeisa May 15, 2024 ni-in, Tonzang tonwhship a om SACte’ galphualte a busim zawh ni 10 khit May 23, ni-in, Tonzang khuapibup lakhiazo uh hi. Tua tungtawn a thu piang hi ci-in, Chinland Council ah Secretary Salai Paul in gen hi.
” Hih bang a gamtatsia galkapte pen ko, Chinland Council sungah kipawlpihte’ pawl tuamtuam pan galkapte hi-in, amaute abanban in thusitna akineih khitteh, Upadi (Law) om bangin thubawlna kinei ding hi” ci-in Salai Paul in genbeh hi.
Chinland Council sunga kipawl Chin Joint Force te’n Geneva Convention a om Galmatte tawh kisai zuih ding thukhunte zahtak leh a zui ding uh ahihna June 27, ni-in Chinland Council in thusuahna nei uh hi. Galvai tawh kisai thukhunte zuih ding leh theih dingte Chinland Council sung a om galkap tuamtuamte’ tungah hilhcianna leh zaksakna kineisa hi ci-in genbeh hi.
Abeisa sungin gal mainawk a kuankhia Chin Revolution galkapte in SAC galmatte’ tungah khut khialhna leh gamtat khialhna Video file te Social Media tungah kizelkhia hi. Social Media tungah akizel Video file sungah Tonzang khuapi lakna tungtang ah Chinland Council galkap 5 kimte in Innpi (building) khat sungah liamna baihna thuakin Puanza nuai ah alum SAC galkap 3 te mu bek tham loin, abanban in kaplum uh ahihna Video tawh Social Media tungah kimukhia hi.
SAC galkap 3 te pen Chinland Council galkapte’n thudotna a neih khitteh a tungsiah Uliante kiangah thuzasak hi. Chinland Council galkap Ulianpa sawlna tawh SAC galkap liam 3 teng abanban in a kaplupna Video sungah kiciantak kimu hi.
Tonzang khuapi kikapna ah Chinland Council leh a pawlte in SAC galkapte leh Zomi Revolutionary Army (ZRA – Eastern Command) galkap akigawm vekpi 40 kim a mat banah Galvan tuamtuam mal 100 val leh sumtang MKK. Teng tul 5000 val Chinland Council pawlin matsak / ngahkhia uh cih kiza hi.
Hits: 1