Chin State, Tedim gam huam Tungzang khua-ah tuni July 6, 2024 (Saturday) ni sunlaitak in ZRA te’n kum cing nailo pasalno 9 zawhthawh thu tawh ZRA galkap dingin ban mat uh a, Lamka lamah paipih mang dingin koih uh cih thu Tungzang khuami khangno khatin Tongsan Media ah genkhia hi.
” Hih a mat uh khangnote pen bang mah zong asem thei nailo kum 12 gual lam geiah a kimawl melmel sangnaupang vive uh hiveh aw! Tua dan a galkap thei dinmun hithei nai peuh mah kei lua veh! A bang teng ngaihsutna tawh hih naupangte banmat mawk zawzen uh ahiam?” ci-in, Tungzang khuami tangval khatin gen hi.
Hih akiman naupangte’ innkuanpih nu le pate lungkham lua in, kap ziahziah bek tham loin nupi 3, 4 te bang nak kah lua in sihbup liang uh ci hi. Hih thu hangin Tungzang khuabup kilinglawng mahmah in, naupang khangno nei laite bang cihna ding theilo in taimang / bumang uh cih thu kiza hi.
Tua banah Tonzang township, Cikha khuapi zongah July 5,6, ninih sung ZRA galkap lut ding inn lusi ah khangnote minsazian kaikhawm uh a, tua minsazian laksa teng khuanu khuapate’ tungah zasak uh cih thu Cikha khuami khatin genkhia cih kiza hi. Na tapa uh ZRA galkap a lut kei leh Cikha khua leitang tungah teng theilo ding ci-in, nu leh pate tawnbawl / vaubawl uh ahih manin, khuanu khuapate lungkham mahmah uh ci hi.
Cikha khua khangnote utlo lua uh ahih manin, a sun azan ci loin India gam Manipur leh Mizoram lamah taikek mang uh ci hi. A minsazian laksate uh khua makaiten ZRA makaite’ tungah a puak mengmeng kei uh leh khua sungah Khangno om khempeuh kaikhawm / banmat ding cilai uh ci hi.
Cikha khuapi bek hi loin, khuakim khuapam teng ahi; Mauvom khua, Kansauzang khua, Khuadam khua cihte zongah ZRA te in zawhthawh thu tawh khangno kaikhawm lai uh ci hi. Hih galkap lut dingte ii khasum ding zong a khuapihte ciatin pia ding uh hi cih zong genbeh lai ci hi. Hih ZRA te’ gamtatzia pen Kawl galkap (SAC)te’ sangin ngongtat zaw tham uh hilo hiam ci-in, khuamite in gensia mahmah ta cih kiza hi.
![](https://tongsan.org/wp-content/uploads/2024/07/c6158c2c-2153-43fa-900e-83367d74d164-1024x668.jpg)
![](https://tongsan.org/wp-content/uploads/2024/07/317513825_584758933652007_6952651440114038160_n-1024x576.jpg)
Hits: 5