Chin State, Tedim Township sungah Ukna buluh (SAC)te akidosan laitak in, pil sinna / sang lam nasepna-ah ukna buluh (SAC)te tawh kipawl (Non-CDM) te pen kuakua cih om loin, ZFU/PDF-Zoland, PDF Police, Township People’s Administration cih teng kipawl khawmin thubawlna (action Against) kinei ding hi cih thu Tedim township Pilsinna lam Kipawlna (Education Board) te in June 4, 2025 ni-in Thusuahna pulak uh hi. Tedim township sungah ukna buluh (SAC) te’ sawltak a om pilsinna lam nasem (Sang siate) peuh mah ZFU Education Department ahi Tedim Township Board in nasiatak khaktanna nei uh cih thu kiza hi.
Mipi pilsinna (Public Education) ah Non- CDM nasemte in Ukna buluh (SAC)te dona tawh kisai nawngkai sakna apiang sak nasepnate limlim akitheih leh ZFU/PDF-Zoland, PDF Police leh Township People’s Administration teng kipawl khawmin, akisam bangin ngattak leh khauhtak in thu kibawl ding hi cih Tedim Township Education Board in thusuahna nei uh ahi hi.
Non- CDM nasem cihte pen Ukna buluh (SAC) te’ maban kitodelh theihna ding leh Ukna buluh (SAC) a dote (Revolutionary) asem khangnote leh mipite’ lungsim a nawngkaisak thei, mipite’ sungah kitelkhialhna piang sak thei nasepnate akipan mipi zolsimna cihte banah pilsinna vaiah mimal hamphatna ding bek ngaihsun a, mipite leh minam ading awlmawhlo a nasemte cihna ahi hi.
Ukna suk (SAC)te’ hong kipatkhiat khit akipan mipi’ ading nasepna ahi Pilsinna lam maban kizomthei nawnlo hi. Ahi zongin khuanu khuapate’ hanciamna tawh Tedim Township Education Board in, mipite’ pilsinna lam maban hoihtak kizomkik thei ahihna thupulakna sungah kigen hi.
Tedim Township Education Board in a thusuahna tawh kizui-in, Tedim khuapi pansan / bulphuh in, Chin state / mipite’ tungah zaksakna kinei himah leh kingahzo lian nailo hi. Tukum 2025-2026 Pilsin kum ah Tedim Township sunga om Ukna buluh (SAC)te’n Pilsinna sanginn pawl khat hong kikin, sangnaupangte sang ki-apsak uh cih thuthang kigen ngeingai hi.
Tua hi in, Chin State khuapi ahi Hakha zongah Ukna sut (SAC) pawlin Sang pawl khat hongin sangnaupangte sangkah sak uh a, abeisa kum sangin sangnaupang tamzaw ci hi. Ukna a buluh ma in Hakha ah Private sang 3 bek om a, tukum ciangin Private sang 10 val om ta cih kiza hi. Chin State ah Ukna buluh (SAC) pawlin tukum sungin Hakha, Tedim leh Khaikam khuapite ah sang honna leh naupangte kahsak uh cih kiza hi.
Hits: 4