Chin State, Tonzang Township, Tuimang khua mi Vaivet khua ah pasal nei Nu Cing Lam Ning (Kum 32), Pa Thang Khan Lian ii zi-in June 10, 2025 ni-in Pateh (mushroom) nek khialhna hangin, India gam Manipur State, Churachanpur District, Lamka Zatopi kipuak a, damzo nawn loin a pasal leh atate kumthum leh a lang leh kum khat leh alangte akipan sanggam ulenaute nusia cih kiza hi. Aluang hawm pen Lamka khuapi pan Vaivet khua ah kipuasuak pahin June 11, 2025 ni-in Vaivei khua hanmual ah kivui cih kiza hi.
“Abeisa June 4, 2025 (Wednesday) ni Lo kuanna ah Pateh (Mushroom) botin Lobuk ah huanin ne hive! Nitak lam teh a gilna kipan pahin, zatang kep sunteng tawh upmawh danin kibawl himah leh noptuam vetlo banah gim semsem hi. Sanini (Saturday) ni zingsang Cikha zatopi puakin noptuam vetlo tham loin, khuaphawklo (Sibup) in, tua pan Lamka zatopi lam manlang tak kidelhpih suak himai. Siavuan te’n a sin (kidney) sia lua ta ci uh a, June 11, 2025 zingsang in Lamka zatopi pan hong nusia hi” ci-in misi nu ii meltheih khatin gen hi.
” Tukum pen tukguah zubaih ahih manin, Pateh zong po baih suak hi. Tua zahkhat mahin Pateh nekhia cih kiza kiaukiau pah hi. Tuni zingsang Lamka zatopi pan Vaivet khuami nupi khat zong pateh nekhial in si hi. Tonzang khuami nupi naupai khat zong Pateh nekhial in Lamka zatopi mahah lumin a sung a nau sia hi. Tua nupi zong dam ding/ si ding cih kithei nailo in, lametna tawm mahmah ” ci-in Tonzang Township numei lam nasem makai khatin genkhia hi.
Hong nusia Nu Cing Lam Ning in a pasal Pa Thang Khan Lian leh a tapa neu 2 te khasiat huai takin nusia ahih manin, a kua maciat in thungetna tawh phawkin panpih theihna lampi om bangbang tawh mapanpih ni. Adah akap khempeuh Topa Kha siangtho in hehnem ciat ta hen!
Hits: 7