Tukum 2025 ading Nobel Peace Prize ngah ding kiteelna ah Venezeula gam pan galkap Ukcipna deihlo a langpang makai Pi Maria Corina Machado (Kum 58) in teel ngah cih thu Nobel Prize Selection Committee, in tuni October 10, 2025 ni Norway gam Oslo khuapi (11:00am) hunin tangko khia ta uh hi.
Tukum ading pen Nobel Peace Prize Selection Committee in abeisa kumin mi 286 teel kholhna (Nominees) nei uh a, tukum leuleu ciangin 338 ( mimal 244 leh organization min tawh 94) sazian ngah uh hi. Norwegian Nobel Prize Selection Committee in a tangkona ah Pi Maria Corina Machado pen Venezeula gammite’ ading Dictatorship to Democracy ngahna ding a hanciam numei hangsan khat ahihna tawh Nobel Peace Prize ngah ding kilawmsa uh ahihna pulakkhia uh hi.
Pi Maria Corina Machado in abeisa hunin Venezeula gamah Daihna leh kilamena a om theihna ding leh mipite’n suaktatak Kumpi teelna a neih theihna dingin hanciamna nei in Mipite lungmuanna leh kipumkhatna bawlzo hi. 2024 kum Venezuala kiteelpi madeuh in Maria Corina Machado in Kumpi ding (Cadidate) ngah khin himah leh Galkap ukna lencip (Dictataorship) pawlin khaktan uh hi.
America President Donald Trump zong adeihsak mipite’ phutna hangin Nobel Peace ngah dingin sazian ah kikoih khin himah leh Nobel Prize scholars tampi in a ngahna ding lampi tawm lai hi ci hi. Nobel Peace Prize piak ni (official award ceremony) ding pen December 10, 2025 ni dingin kipsakna kinei hi. Abeisa 2024 kum a Nobel Peace Prize pen ” Japan Confederation of A- and H-Bomb Sufferers Organizations” kipawlnate in ngah uh hi.
Hits: 0