Chin State, Tedim khuapi ah phualsat a om Zomi Federal Union /PDF-ZOLAND tangvalte in tusawng teng Tedim gam huam khua pawl khatah zin kawikawi uh a, galvai a lungkham mipite thapiakna leh thumaan gencianna nei thei uh cih kiza hi. Tedim khuapi lakna (Tedim operation) ah Chin Brotherhood min tawh mapanna kinei ding ahihna zong mipite’ tungah kiciantak (official) pulakna nei uh ci hi.
Tua bang a thusuahna a om masiah mipi galtai kullo hi. Ahi zongin a tai nuam veve te zong bel suakta tak in tai thei hi ci-in, PDF/Zoland Makaite’n genkhia ci hi. Tuithang khua nawl / khua lutna ah kikhai ZRA Dialkhai (Flag) pen PDF Zoland tangvalte’n hemkhia /paih khiat sak cih thu Social Media ah thuthang (News) manlo akigenna tawh kisai zong zuau thu / kidaisakna ahihna thu PDF-Zoland makaite’n gencianna leh pulakna nei uh ci hi. A thupi khatah Meitei gun Tuithang / Philtun gunlei ah Lam khak a om CNFte’ khutzat Zomi kampau PDA kicite’n Gunlei khakin mipi tungah sum ngetna a neihna uh honkhia sak uh ci hi.
PDF-Zoland tangvalte Tuithang khua alut hunin ZRA dialkhai (Flag) cih limlim omlo ahihna leh Tunzang khua nawl a ZRA dialkhai zong huih in a mutkhiat ahihna thu PDF-Zoland makai pipa in gencianna nei hi. PDF-Zoland lam te’n Tedim gam pen amau thu neihna nuai ah om ahihna thu zong genkhia uh ci hi. Tua banah ZRA te tawh Unau laizom khat hihna leh bang mah kitelkhialhna leh kilangpanna omlo banah Ukna buluh ngongtat galkap (SAC)te do khawm dingin kizawn / kilamen den ahihna thute zong pulakna nei uh cih kiza hi.
PDF-Zolandte’ a khualzinna Tungzang khua leh Tuithang khuate ah khua mite in maitai leh lungdam takin na muak bek tham loin khuazang bupin kikhoppih ziahziah uh hi. Khua mite khempeuh galtai nawn lo ding leh lungnuam tak a om ciat dingin thugenna nei uh ci hi. Tua bek tham loin, Tungzang khua ZYA te’ makaihna tawh Vok khat gawhin ankuang umkhopna nei thei cih kiza hi.
Hits: 13