US gam sung om Zomite kipawlna lian pen khat ahi Zomi Innkuan USA Inc., (ZIUSA) in Zomi Revolutionary Army- Eastern Command (ZRA-EC) thapia leh amakaih Zomi Political Coordination Committee (ZPCC) tawh kizopnawn loh ding leh ZRA-EC te’ thu pom “Zogam Charter” endorsement zong ZIUSA tawh kizopna pan lakkhiat dingin khensatna leh kipsakna nei uh cih thu October 25 ni-in taangko khia ta uh hi.
Tua thu khensatna pen ZIUSA Kumcin Khawmpi 2025 pan thukhensatna tawh kizui-in ZIUSA Board of Directors ten khensatna leh kipsakna a neih uh ci hi. Tua mah bangin “Zogam Charter” zong Kawlgam khuahun zui in abeisa ZIUSA board in endorsement apiak uh hi mah leh Zomi te ki-itna, kipumkhatna leh kilemkikna ding deihna tawh tu’n lakkhia ta dingin ZIUSA Board in kikhensatna nei uh ci in ZIUSA in thu suahna Statement sungah pulakna nei uh hi.
ZIUSA kiphuh khiatna leh a deihna bulpi pen genvai bulphuh (social organization) in abeisa March 26, 2005 ni-in Zomi Innkuan Kipawlna 6 te in Hollywood, Florida pan aphuh khiat uh ci hi. Ahi zongin tu’n ZIUSA nuai ah Zomi Innkuan Kipawlna 47 bang om ta a, Genvai alut member vekpi 16,000 val om ta cih thu kiza hi. Gamsung gampua Zomite’ muhna leh genna ah bel “ZIUSA in Zomi bup hong huam in hong makaih zawh nang kilunggulh in lametna lianpi kinei hi ” ci-in, ZIUSA ah akihel makai lui pawl khatin gen uh hi.
Ref: ZIUSA Statement & FB page
Hits: 3