Sgaing Region, Kalaymyo pan Chin State, Tedim Township ah lut dingin a paito Ukna buluh (SAC) galkapte pen Chin Brotherhood (CC) leh Chinland Council (CC) te kipawl khawmin, do leh dal khawm uh cih kiza hi. Tua a zalom asim SAC galkapte dona ah CB Alliance sung pan CDF-CDM Siyin, PDF-Zoland, CDF-KKG cihte in tukha May 21-23, 2025 nithum sung vilvel Tedim Township, Mualpi leh Taingen kim tengah nasiatak do masa uh a, tua khit May 24, 2025 ni akipan Chinland Council (CC) ten huh in, mapang khawm thei ta cih kiza hi.
” Tuni tuhun pen ko pawl, amau pawl cihte hithei nawn lo a, Ukna buluh (SAC) te bei siang sakna ding cih ngimna kibatna khat hangin CC leh CB cihte omsak nawn loin kipumkhat a SAC gal dokhop ding hun ta hi. Tua bek tham loin, Spring Revolution kici khempeuh kipawlkhop theih ding kisam lai hi. Tua bang a kipawlkhopna a om kei leh i gal ahi SACte kizozo ngeilo ding hi. Tua hi in, akibang i galte zawhna dingin i thatang, i galvante gawm khawmin mapangkhop ding kisam mahmah ta hi” ci-in CNF thugenpi Salai Htet Ni in genkhia hi.
Tedim Township sungah Chinland Council (CC) te’n a laksa/ zawhsa Taingen khua SAC Camp leh Kalaymyo kikal ah Chin Joint Force leh SAC pawlte kaalkhat sung kikapna om khin ta ahi hi. Tua kikapna ah SAC pawlte Mawtawpi 15 a dim khop ding galkap 250 val Lt. Col. khat makai in, a ma tuanna Mawtaw leh a galkapte khe tawh kuanto uh ahi hi. Ahi zongin a Mawtaw teng bel Kalay University huang ah koih uhcih thu Chin Revolutionary makaite’n gen himah leh a nung lam ciangin SAC galkap 800 kim kuanto cih kiza hi.
Hih Chin State, Tedim township ah alut sawm SAC galkap 800 kimte in galvan tuamtuam ahi Drone, 40 MM, 60 MM te tawh kap ziahziah banah Kalaymyo pan zong 120 MM tawh gallot / galkap uh cih Chin Joint Force makaite’n gen uh cih kiza hi. SAC galkap pawlte in galdo zia (military strategy) dingin Taingen Camp mah lakkhiat kik ding banah Tedim khuapi ah galkap koih beh theih ding geelna nei uh hi. Tua mah bangin abeisa a Chin Brotherhood (CB)te’ lakkhiatsa Falam khuapi zong lakkhiat kik zawhna ding ngimna ahi hi.
“Amau (SAC)te’ ngimna bulpi bel Tedim lamah a lut sawm banah Falam lam zong lut sawm uh ahi hi. Amau ngimna bulpi taktak bel a supsa/ tansa uh Khuapite ngah khia kik ding leh ukcip kik ding cih ahi hi. Tutung galkikapna bulpi pen tua a ngimna hang uh himai hi. Tom gen mai leng Falam khuapi lakik nuam, Tedim khuapi ah Galkap behlap nuam uh hi” cih thu CNF thugenpi Salai Htee Ni in genkhia hi.
Chin Joint Force te’n hih SAC te’ gal mainawkna pen a khaktan zawhna dingin May 20- ni akipan Kalay- Taingen kikal Mawtaw lampi tawmvei khaktan phot uh cih thu CDF-CDM Siyin te’n tangko khia uh ci hi. Kalay – Taingen Mawtaw lampi tungah Mualpi, Theizang, Hiangzing leh Vomsem khuano teng pan khuami 1000 val galtai uh cih kiza hi.
Kalay – Taingen huam sung teng pen Kalaymyo leh Chin State leilu lam a om Khuapite tawh kizopna lampi ahi hi. Tua manin Chin Revolutionary pawlte’n a lakhiatsa Taingen SAC Camp pen Kalaymyo a om Regional Command Headquarters (RCH)/ (ဒကစ) phualpi te’ ading Military Strategy Camp khat ahi hi.
Hits: 4