Thailand leh Myanmar gamgi Karen National Union (KNU) Brigade-6,te ukna sung (Administrative Area) Duplaya District, Kawkareik Township (South of Myawaddy) kiang a om Ukna sut (SAC)te’ galphualpi nihte ahi; Maokhee leh Tho Chu (Bayint Naung army) galphualte pen Karen National Union (KNLA leh akipawlpihte in May 30, 2025 nikhat sungin busim in lakhiazo uh cih thu KNLA Commander in pulakkhia hi.
Karen minamte’ lawhna Maokhe khuaneu (Moakhe Camp) a om Ukna sut (SAC) galkapte pen May 30, 2025 ni zingsang (10:00am) hun pawlin Camp nusia in a taimang banah, Tho Choo (Bayint Naung) Camp a omte pawl bel abeisa May 28, 2025 nitak pekin taikhia khin tham uh cih thu KNLA Commander in gen hi.
” Kanay Lay camp a kiluhna ah 120 MM 2 pen ka ngah khia pah uh hi. Kalay Lay Camp ka lakkhit uh teh Maokhe Camp zong kilakbeh suak a, SAC lam pan Thaupi tawh kapna cihte omlo bilbel hi. Tho Choo Camp zong kepcip zawhna ding lamet tamsa lo uh ahih manin, May 28, ni pekin SAC galkapte a vekpi in taikhia in kikhenthang khin ta uh hi.” ci-in KNLA Commander in pulakkhia hi.
Maokhe Camp pen abeisa 2022 March kha sungin KNLA galkapte’n khatvei kibusim in kilakhiakhin ngei himah leh tua laitak SAC galkapte galhuh 200 val tawh kuan uh ahih manin, kizo loin luah kik uh hi. Tutung hih SAC Camp mun nih akilakna tungtang ah Maokhe Camp ah SAC galkap 30 val deuh bek om uh a, Thu Choy (Bayint Naung) Camp ah SAC galkap 27 bek a om laitak ahih man hi cih thu KNLA Commander in genbeh hi.
Hih bang danin KNLA leh a pawlte’ omna Thailand- Myanmar gamgi Brigade -6, area sung SAC te’ phual satna Campte pen abanban in kilakhiazo a, tulaitak Ukrit Htah gal puakna Camp, Wale Strategic Camp leh Tee Baw Boe defensive Camp cih teng bek om lai cih kiza hi.
Hits: 4