” Ka thu hong mang makaite kong pia dinga, amaute in Pilna leh siamna tawh note hong uk /makaih ding uh hi.” (Jeremiah 3.15)
Thu Patna:
Makai i cihpen a omsa te’mai-a tavuannei cihmaimai hi lo;akisiacipsa a ngeina a batkikna ding a, nasem; makai ahi hi. Leitung kumpi – gamki ukna a hoihna dingin, gam a it taktak, a netum nuam hilo, a puah / a zuun nuamte in makai leh gam hoih thei bek hi. Tua mah bangin biakna gam a hoih theihna dingin Pasian’ lam lahna angah Pasian’ gam ading-a hunbit a kipumpiakte mahin makaih leh biakna cidam, lamzang leh kipin khangto hi.
I. Thuciamlui hun Makaih zia:
Pasian in Kumpi nam leh Siampi namnih koih a, biakna vai khempeuh Siampi nam (levite)te in sem hi. Kumpi Sawl in Siampi Samuel’ sep ding Biakpiakna sem kha (tuh / dem) ahih manin Pasian in a meivak khin khiat sak hi. Israel Kumpi Rehoboam in Siampi te bekin a sep ding Paknamtui meihal biakna tau ah lutin biakpiakna pia a, Siampi te’n khaam (phallo) hi na pi khawl nuam loin sem veve hi. Pasian in daan / tawsatna pia ahih manin, a khut konggaw ton thei nawn lo hi. Huhna a nget ciang Siampi te’n mawhsutna neih sak a, tua ciangin a khut konggaw pen damkik thei pan hi.
II. Tuhun Christiante’ Kimakai zia:
1. Upa (Deacon): Khamtunggam ah Pasian’sawltaak Sangmang (Mikang)te’ ong pattahna tawh Ngeina biakna (Lawki) pan Christian (Tapidaw) kisuak ciat hi. Pawlpi makai dingin Upa/ Pastorte nasep dingte na hawm sakin, Pastor khatin khua pawlpi tampi makaih uh hi. Tua hun laitak in Pastor cih gen thadah Upa kician nangawn omloh hun ahi hi.
Hih Vaipuak akipia Pastorte’n tuiphumna, Neekkhawm piakna leh Nupa siangtho kiteennate cihte bek vaan zo uh hi. Nipi ni biakpiakna (Sunday worship serve), thu vaihawmna leh Nopna dahna hunte ah Pawlpi sung nasem (Tuanvai)te in vaipuak la ahih manin “Upa” min kivawh uh hi. Hih upa te in vai khempeuh vaan ahih manin, agim atawl pente leh thunei pente hipah uh hi.
2. Pastor Kicinna mun ah: Khamtung / Chin State sung veve Tedim kampau’ a zangh lote’ Pawlpi ah Pastorte in Biakpiakna ding vaihawmna, Thu vaihawmnate ah makaih ta uh hi. Hih pen Kamsang Jerimiah genkholh Jeremiah 3:15 sung abang in a kalsuan , Lai Siangtho azui uh na hi gige hi. Khanglui te’n “Sing om lohna ah Gua kizangh” a cih mah bangin Pastor a om ma / akicin ma-in Deacon (Upa) i cihte kizangh hi. Pastor a om / akicin ciangin Upate uh pil vaang ahih manin Pastorte’ makaih ding hi ci thei uh a, amun awn uh hi.
Tedim kampau a zanghte’ lakah Pastor om ta leh om ta kei leh Deacon (Upa) i cihte in tu ni dong pawlpi makaih kha lai uh hi. Lai Siangtho leh Pawlpi te’ thukhunte ka et-kawikawi ciangin Deacon te’makaih na’ng omlo hi. Pawlpi lian mahmah in Hau mahmah, pil thei mahmah phial
ta leh Ordained Pastor a om kei leh Pawlpi kician khat / kipkhat in kisaang theilo hi. Deacon 1000 bang a om ha’ng zong Pawlpi kician in kisang theilo hi.
Pawlpi sung ahi a, pawlpi pan a tungsiah kipawlnate ah ahi zongin, Makaipi dingte pen Pastor te ahi dingin Pasian’sehsa ahi hi. Nupa bangin genteh le’ng: Pastor pen a “pasal”; Deacon pen “a zi” hi a, a geel leh ahuh cih dan ahi hi. Pastor te’ geelna a sem ding Deaconte hi zaw hi cih pen Lai Siangtho leh Pawlpi’ thukhun ahi hi.
III. Gam sung Cidamna dingin:
Kumpi gam leh Biakna gam 2 thu ka gen nuam hi. Kumpi gam hoihna ding ki-veii ciat a, ahi zongin Pasian’nasemte in Kumpi gam uk-khuan neilo hi. Tua mah bangin Biakna gam hoihna ding ki-veii ciat a, ahi zong Kumpi nasemte, Sum bawl Sum zon nasemte, (Biakna ah Hunbit akipia lote) in makaih theihna / thunei het lo hi cih i phawk tawntung ding kisam ahi hi. Hunlang (Part time) panmun neite’n Hunbit Pastor te uk zaw sop cih bel Biakna maan suak thei lo hi.
Hih thute banah Pawlpi kem Pastorte i ki-etphat mahmah kul hi. Pasian’ nasem ding sapna kician (Calling) ka ngah takpi hiam? Mite’ ong seh / hong koih mawk lel ka hi hiam? Kei le kei alawp tawm lel ka hi hiam? Pasian in ama’sawlte Kha Siangtho vangletna kiciantan omlo / kiteh loin pia hi (Jn.3:34). Elijah, Elisha te in, “kei Pasian’ Kamsaang ka hi “ cilo na pi’n, Mipi te in Pasian’Kamsaang pa ci thei uh hi. Ei leh ei ki Sia sak gawp mawk loin Mipi te in, “ I Siapa / Pastor hi; Ka pastor uh hi” hong cih ngam dingin nuntak kul hi (Jer.3:15; Ef.4:11).
By: Rev: Hau Go Kham (Retired Pastor of Emmanuel Baptist Church), Kalaymyo
Hits: 12