Shan State (Southern), Pa-O area Hsi Hsei khuapi pen Jaunary 27 ni-in busim in kilakhiazo ta cih thu Pa-o National Liberation Army (PNLA) in pulakkhia hi. Abeisa January 24 ni pan kipan Hsi Hsei khuapi a om SAC galkapte leh amau nuai a om PNO (Militia)te kipawlin, PNLA te leh amau kipawlpihtenasiatak kikapna om a, Tualsung mite leh Karenni lam pan galtai mipi 100000 kim galtai kibehlap cih kiza hi.

” HsiHsei khuapi bup kilakhiazo ta himai. Ahi zongin SAC leh amau mizat PNO (Militia) te’n Thaupi tawh hong kapkap lai uh” cih thu PNLA pawlte tawh kinai khatin gen hi. Tua kikapna sungah Pa-o minamte’ ading mun thupi mahmah khat ahi Kaung Mu Buazua Monastery, Hsi Hsei khuapi laizang a om Ere Magan Dhamayon, Hoche monestry sang huang sung a om Innlianpite leh khuamite’ teenna Inn tampi kisiacip cih kiza hi.

” Kikapna bel dai nai tuan kei. Saih Khaung panin Thaupi tawh hong kap ziahziah lai. Saih Khaung khua a om khuamite khempeuh zong taikhia mang uh hi. Tua banah Saih Khaung lamah kikapna kizomsuak thei lai ding dinmun ah om hi” ci-in Hsi Hsei khuami khatin gen hi. Hsi Hsei khuapi a om police station, Township General Administration Department zumpi akipan Department tuamtuamte PNLA leh kipawlpihte’n ukcip zota uh ci hi.

Abeisa january 26 ni-in zong Hsi Hsein khuapi ah SAC in vanlam pan bomb khiatna hangin naupang a leh numei 2 in liamna ngah uh ci hi. Hsi Hsein khuapi kikapna pen Pa-O National khat leh khat kikap / kido ding hilo in, Ukna buluh (SAC)te’ nasepnate akizopsuakna dinga mizat mite’ khut sung pan suahtakna lampi tungah amanlang galkah in, mapang khawm a sepkhop ding ahi hi ci-in, Pa-O National Liberation Army (PNLA) in January 27 ni-in pulakkhia hi.

Hits: 1

Byadmin

Leave a Reply

Your email address will not be published. Required fields are marked *