Chin State, Tonzang Township Mualkawi khua kim a om ZRA te’ galphual khat pen CDF- Tonzang te in June 9, 2025 ni zingsang lamin busim in, lakkhiazo uh cih CDF- Tonzang in pulakna nei uh hi. Tua ZRA Camp lakna ah nai 2 sung ding nasiatak kikapna om in, ZRA galkap 2 si cih kiza hi.
Tua banah Mawtaw 1, Drone 2, Meiset 1, Thautang bawmpi leh Thau lawng 4, thautang honpi khat leh adang galvan tuamtuam zong ngah khia uh ci hi. ZRA Camp lakna ah CDF-Tonzang makaipi Zo Mumung Operation cih min tawh galdo uh ci hi.
ZRA te pen Cikha, Singgial, Mualkawi khuate pansan in, Tonzang khuapi pen 2 vei vilvel a busim/ a kap banah Tonzang khuapi a ukcip nopna thu uh pulak thapai uh cih zong CDF- Tonzang pawlin gen uh hi. Tua zah khat mahin nasiatak a do/ a kikhaktan cip ahi hi cih zong genbeh uh cih kiza hi. Mualkawi kikap masakna pan hong nusia CDF- Tonzang galhang 4 te’ luanghawm ngah khiat nopna hang tawh akido/ kikap ahihna thu genbeh hi.
Abeisa April kha 2025 sungin Tonzang khuapi a om CDF- Tonzang galkapte pen ZRA galkapte in a hawl khiatnop manun nasiatak kikaptuah uh hi. Nakzaang khua leh Bungmual khua ah kikapna om lopi in, khuazang inn teng kihaltumna hangin, ZRA leh CDF- Tonzang kikal ah kuazaw hal hiam cih nasiatak kinialna om hi. Tulaitak Tonzang khuapi pen CDF- Tonzang pawlin kemin, ki-ukna lam tawh kisai maban zomtoto uh cih kiza hi.
Hits: 1