Sagaing Region, Pale township, Kant Daunt village ah tuni June 10, 2025 (12:15pm) hun pawlin Peoples Liberation Army (PLA) te’n Kant Daunt Police station busim in nasiatak kap uh a, Ukna buluh (SAC)te’n zong gal vanleng tawh nasiatak kap ziahziah uh hi. SAC lawm galhuh vanleng China bawl (FTC-2000g) Jet fighter khat pen Peoples Liberation Army (PLA) pawlin kapkhiatsak uh ahih manin, Vanleng kia bek tham loin ahawl (Pilot) a lutang guh leh a pumpi them neng bek kimuthei cih thu PLA galkapte’n gen uh hi.
” Pilot lutang guh kimu in, a thuamte om lai maw cih bel thei loin, a lom khat om hi! A pumpi zong kiciantak om nawn loin, a tum atawng kimuthei bek hi. Vanleng a puakkhap ciangin, Pilot pa pumpi zong a them aneng in lengkek hi. Phungzi sang huang sungah Vanleng kia ahih manin, phungzi sanginnte zong meikang tum himai “ ci-in PLA galkap khatin Online tungah genkhia hi.
Kant Daunt khua Police Station kikapna pen abeisa June 3, ni akipan hi-in, SAC lamte a si aliam tampi om khin ta ahih manin, Pale township sung a om khuaneu khempeuh ah sun le zanin Vanleng tawh kap ngekngek uh cih khuamite’n gen hi. Tuni June 10, ni vanleng kiat ma ciangciang 10 val vei bomb khiat ngekngek banah vanleng kiat khit ciang dong tawlnga nailo lai ci hi.
Vanleng bomb khiatna hangin Min Dain Pin khuaneu ateng Puteek khat leh khuami 2 si-in, 10 val liam uh ci hi. Mindainpin, U Nauk, Mini Kan, Nyaung Tin Kone, Thaza Kone, Tayeik Kan, Htan Taw Taik, Thapyi Kone, Inkyan suh, Man Kyi Suh, Gaing Dwin, Sho Pouh Kone, Thayet cihte akipan Pale Town kim leh pam a om khua 20 val pan mipi 25000 val galtai uh cih kiza hi.
Tulaitak pen tuk sung ahih manin, galtai mipite’ ading cidamna lunghimawh huai banah annek tuidawn leh zatui zaha dongah donghu kisam mahmah ci hi. Pale Township sung Kan Daunt village, Inn Ma Htee, Zee Phyu Kone, leh Pale khuapite ah SACte’ vanzat Pyusaw Htee te thahat mahmah lai uh ci hi.
Ukna sut (SAC) te’n bel galvanleng leh Helicopter tawh bomb a khiatnate ah vanleng kia te pen Engine kisia hi ci-in, zuau phuakin pulak zel uh hi. Abeisa May 20, 2025 ni a kachin State, Bha Mo khuapi ah gal huh a pai Galvanleng 2 pen KIA in Drone tawh kapkhiat sak uh a, tua zong Engine kisiatna tawh akia hi ci-in zuau phuakin thupulakna nei uh hi.
Hits: 5